E lei faaaloaloa le saunoaga manino mai i se tasi o tamaitai tapousa o le ituaiga o le Little Sisters of the Poor, o le Ekalesia Katoliko, Sister Telesia Lafaele Utuoaluga, i le tulaga ua faaaogā ai nei le nofoaga o loo tausia ai tamā ma tina matutua a le Ekalesia Katoliko i Mapuifagalele.
O le faanoanoaga a le tamaitai Sa, ona ua foliga mai ua agai ese le aano moni o le mafuaaga o le fausia o le nofoaga lenei mai i lona mafuaaga na ala ai ona fausia. O le mafuaaga e pei ona faaalia e Sister Telesia, e mo i latou ua leai ni aiga.
“O le nofoaga lenei na fausia mo tagata vaivai, ua leai ni aiga e nonofo ai.” O le manatu autu o Sister Telesia, ua foliga mai le nofoaga, i Mapuifagalele ua “tuu tia’i” iai mātua, ia poo nai tina ma tamā matutua e fanau, ona “o” lava lea o se vaega oi latou ma agai atu e vaai mātua.
“Ou te iloa lelei, auā a talatalanoa atu i nai tina ma tamā, e viga lava i latou fanau, e fai mai poo fea o iai, matuā leva ona alu.”
“O loo faasino tonu latou fesili ia latou fanau.”
O Sister Telesia, ua leva tausaga o galue i Mapuifagalele. O le 1975 na uluai avea ai ma tamaitai Tapousa o le ituaiga lava lea, ma o Mapuifagalele o lana uluai nofoaga galue faa Tapousa. Na mae’a ona tofia lea e galue i atunuu i fafo.
O atunuu e aofia ai nofoaga eseese i Asia, ma o loo galue nei i se tasi o pitonuu i totonu o Melesia. O lana lea galuega faa Tapousa, o le tausia lea o tagata matutua.
O se galuega ua faaalia e Sister Telesia, e fiafia e fai, ma o se galuega e fesootai tonu i lana galuega sa galue ai, a’o lei avea ma tamaitai Sa, o se tamaitai tausi mai pasi – nurse.
I le faatalanoaga ma Sister Telesia, na ia faaalia ai, o lana matau i le nofoaga i Mapuifagalele o se nofoaga e tumu i faamanuiaga.
“Manatua o le tatou lava lea talitonuga faa-Samoa na tatou ola a’e ai ma a’oa’oina ai tatou o le tagata tausi matua o le tagata lea e sasaa iai faamanuiaga mo ia ma lona aiga, e faapena la le nofoaga i Mapuifagalele, o se nofoaga e tumu i faamanuiaga mai le Atua.”
“Le faamanuiaga lea, lea ou te taumafai e toe faamanatu atu i fanau ma alo o si tatou atunuu.”
Saunoa Sister, o lana matau i le taimi nei i Mapuifagalele, ua pei o se nofoaga e tuu tia’i atu iai mātua e le fanau ua lē mafai ona o latou tausia.
“Ua avea le tele o le pisi i galuega ma tiute ua misi ai le faasinomaga na a’oa’oina ai tatou o Samoa o le tausi matua.”
“E moni o loo matou talia ma o matou tausi i tina ma tamā matutua, faataele, fafaga, faafiafia ma tausi, ae lē mafai ona o matou suia pe replace ina le lagona misia ma le lagona fia mafuta o se tina poo se tamā i lana tama moni na ifo ane i lona manava.”
“O le tele o tamā ma tina, a uma loa ona faatino uma matou galuega faatausi e pei ona tofia iai matou, ona matou talanoa lea, e fiu e talanoa atu i nisi taimi ae na’o le sioa lava, ma ta te te’i lava ina ua fesili mai, ma fai mai poo le ā le taimi e sau ai le vaa i Savaii, poo ai o malaga mai ai, se isi o lana fanau.”
“Ae o lena teine poo lena tama, na gata lava le vaai iai o sea tina i le taimi na momoli atu ai, ona galoma atu ai lava lea, ou te lei toe vaai iai.”
O le fautuaga mai i le tamaitai Sa, o faamanuiaga o loo tumau pea i le tagata tausi matua e pei ona talitonu iai, ma e ao pea ona mulimulitai iai e pei ona masani ai. Ae o le isi tulaga o loo ia faafetaia ai le pulega o le Mapuifagalele, i le faasafua atu lea o le tautua i mātua mai soo se ekalesia i le atunuu.
O le vaiaso fou e toe taliu ai le tamaitai Tapousa i Meleisia i le nofoaga o loo faamautu iai i lenei vaitau se’i vaganā ua toe sui atu lona valaauina.
