E lē o toe po malaē e pei ona silafia ai foi le aso mālōlō o le tupu tamaitai, ae tulimatai ai faamanatuina e Samoa i Ausetalia o le sisiina ae o le tagavai o si o tatou malo tutoatasi.
O le tuufaasolo ai o le fesuiaiga o mafutaga i Brisbane e tapenaina le fu‘a i tausaga taitasi, na suipi ai le Mafutaga a Ekalesia Tuufaatasi i lenei foi tausaga.
Sa tatalaina foi i sauniga masani i le afiafi o le Aso Sa, 12 o Iuni ma polokalame masani lava, ma na molimauina pea le lagolago o le atunuu i soo se vaega e ala i le matagofie o faafiafiaga ma pese auā na fai sao uma faafeagaiga ma faletua. Sa taitaia le sauniga lotu i lea afiafi e le susuga i le toeaina ia Leivi Mulitau‘au Pele (Ekalesia Full Gospel).
O le Aso Gafua na sisiina a‘e ai tagavai e 2 a Samoa ma Ausetalia ma faagasolo loa polokalame. Na faatāuaina e le Aao tusitusi o le Mafutaga, o le failautusi foi lea o le faasinoti Ekalesia Metotisi, le susuga ia Sa‘iliai Tuma‘ai, se taiala e faapea “Aua ne‘i galo sa avea i tatou ma pologa a o lenei ua faaeaina”.
O le pese faaleaganuu sa lagiina e le faasinoti ekalesia Metotisi. Sa a‘oina e le susuga ia Lesa Tulifau, a o faaevagalia na tapenaina e le puleaga Katoliko.
O le ma‘ulu‘ulu ma isi faaevagalia sa feagai lea ma le matagaluega EFKS.
Na fiafia puupuu lava lea aso, auā na leai se vaipanoa o le paka a le tofāmamao e avanoa i le lolofi atu o le atunuu se‘i maimoa i le aave mai o tala o tapenaga o le Tutoatasi.
Tele le fofoga taumafa i lea aso sa faapea ona gaseseina e le faleaiga o le Paepaelei (Fuimaono & Silipi Setu).
Na tolaulauina ai le tele o iuga o taaloga e pei o le tagapolo (golf) ma isi. Ua toe lafo atu nei le faamanatuina o le fu‘a o le 2012 i le Mafutaga a le Aiga Samoa i le itu i Matu pe a tusa ai ma se ola ma se malosi e aulia atu i le alofa o le Atua.
