E ui ina fai sina velavela ma le aasa o le la pe tusa o le 33 tikeri le maualuga o le vevela i le aso malolo o Ausetalia i Brisbane, peitai e lei taofia ai le lolofi atu o aiga uma o se tasi o mafutaga, le Leo o Samoa i se latou fiafia e faamanatu ai le tasi tausaga talu ona amataina la latou tautua.
Na amataina lenei mafutaga i le aso 24 o Oketopa i le tausaga e 2008. Na faamaea ona resitalaina ia Tesema 2008 ma ua alagatatau ma talafeagai lenei aso 26 o Ianuari o le aso malolo a Ausetalia e faamanatu ai le tasi tausaga ona o le tele o aiga faatoa taliu mai i faiga malologa i Samoa ma isi atunuu.
O le taimi foi faapenei i le tausaga ua mavae, Aso o Ausetalia (26/01/2009) sa faapea ona faia ai se faaleleiga i le va o tagata Apoliki ma tagata Samoa iinei i Brisbane talu mai le tagatavaleina o le alii apoliki o Richard Saunders, o le uncle o le alii lakapi liki o Jonathan Thurston, lea o loo taofia ai lava tamaiti Samoa e toaiva na tuuaia i le maliu o lenei alii.
O lea faamoemoe sa faataunuuina i le taimi faapenei o le tausaga ua mavae, sa taulamua ai lava le mafutaga a le Leo o Samoa poo le Voice of Samoa.
O le faatasia o aiga taitasi i le aso malolo o lenei tausaga, o se aso uigaese aua e ui lava e iai nisi e lei auai ona o tuatuagia, peitai na vaaia lava le toatele e fai o tamā ma tinā matutua, le loaloa o le mafutaga faapea tupulaga talavou ma tamaiti.
Sa faia ai le tele o taaloga e pei o pelē suipi, tomino, mu, lakapi pa‘i ma volipolo, ma le tele o taaloga a alo ma fanau.
O le tupu ma le ola o le mafutaga e muliga foi le toatele o le isi ekalesia i le toatele ma le maopoopo o le mafutaga a le Leo o Samoa, ae o nei tagata e eseese uma a latou ekalesia.
Sa fesiligia e le sui o le Samoa Times i Brisbane nisi o tamā ua ou maofa i le matuai tumu o le latou mafutaga, pe o le a le mafuaaga, ae o tali a nei tamā matutua, “E mafua ona maopoopo ma ola le mafutaga auā foi e lava papale ma faautauta le peresitene ma le Laulau a Fono, e mulimuli ma savavali ia latou faamatalaga, o le ala foi lea e fiafia ai tagata uma o lenei mafutaga”.
Saunoa foi nisi, e pei o se aiga e tasi le latou mafutaga, e galulue ma faifai mea faatasi tagata uma, e fesoasoani foi le tasi i le isi.
O loo iai le faamoemoe e toe fai le faafouga o resitala a le mafutaga i le aso 21 o Fepuari, sosoo atu ai ma le suiga tofi i le aso 28 lava o Fepuari. Sa matuai mamafa le taumafataga sa tapenaina e aiga uma o le mafutaga aua i latou ma le auvalaaulia sa molimauina lo latou faamoemoe.
O i latou foi la sa lagolago malosi ma o loo fesoasoani pea i le Leo o Samoa e aofia ai, Fata & Rosa Peteli (Matau‘aina’s Takeaway), Galumalemana & Apu Timoteo (Enchiro Laei & Island Freight), Ropati Savelio (DJ) Eric Pepe (Pule Sili o le One Sound Band), Lesine & Salu Hunt (Foai mai Fale‘ie), Excess (Foai mai meaalofa mo Alo ma Fanau).
O le Laulau a Fono a le Leo o Samoa
Peresitene – Faimalōtoa John Pale
Sui Peresitene – Moefaauo Moli Mikaele
Teutupe – Lemalu Faatoaga Felise
Failautusi – Vaaaoaoa Alofipo
Sui Failautusi – Masoe Falemoa Pepe