Maoona, sosola ae lē totogia le faleaiga Initia

O loo finau pea le alii pule o le fale‘aiga a le Gengys i le pitonuu o Henderson, le susuga ia Jaysh Kumar, ina ia toe fesootai ma se tasi o aiga sa faaaogāina lea nofoaga peitai, na faaiu puta lea mafutaga ina ua sosola ae lē totogia le faleaiga.
O le tamiatai Samoa ma se alii Tonga sa faaipoipo i le aso muamua o le masina o Me o le tausaga nei lava, sa faatoaiina le galuega mo le tapenaina o le taumafataga mai lea foi kamupani.
Na solosolo manuia mea uma ina ua faataunuuina le aso fiafia.
Peitai na avea ma aso faanoanoa i le alii pule o le kamupani ina ua fiu e tuli lea ulugalii fou mo le totogi o le taumafataga, ae ua lē toe fesootai ane.
O le tamaitai Samoa e suafa ia Bella, a o le alii Tonga e suafa ia Soape, o loo matuā manaomia tele e le alii pule soo se faamatalaga lava e uiga i lea ulugalii.

O loo sailia pea ma faauauau taumafaiga a le pule ma le pulega i soo se auala lava e mafai ai ona toe maua le au ula leaga e pei ona ta‘ua.

O se faamatalaga sa tuuuina mai e le alii pule i se feiloaiga ma le Samoa Times i le vaiaaso talu ai, sa ia tautino ai e faapea sa totogi e lea aiga le na o le $200 e tiposi ai le taumafataga, ma le faatuatuaga sa tuu i ai e toe faamae‘a ane le paleni pe a uma lo la aso fiafia.

Sa ta‘ua foi e Kumar e lei iai sona masalosalo i lenei aiga i le uluai taimi sa latou feutagai ai, ona sa faailoa ane lava e lea aiga, o laua ma o la aiga e Kerisiano.

O le mae‘a ai o le la faamoemoe, ma sa fai lava si tuai ona faaiu lo la aso fiafia, ae ua taunuu atu le isi foi ‘aiga tele e faaaogāina ai le nofoaga, sa avea ai ma mafuaaga o le pisi tele o le aufaigaluega, maua ai loa ma le avanoa e sosola ai le ulugalii ma o la aiga, ae lē faamaoni i tuutuuga sa malilie faatasi i ai.

O le faamatalaga a le alii pule e faapea, sa toe fesootai i ai i le aso na sosoo ai, ae sa tali ane e uiga i se feau tusitusia i le telefoni, ma faapea ane ai, e aua le popole e toe foi atu lava ma le seleni.
Na mae‘a le isi aso atoa ma le vaiaso a o loo faamoe ane pea le alii pule i faaupuga mālie ma le tausaafia, ma faailoa ane pea o laua e Kerisiano, ma aua le popole e toe foi atu lava.

E oo mai i le taimi nei e foliga mai ua lē toe amanaia ane lava Gengys ma lana auaunaga, ae tiai faafasifai.
O le mafuaaga lea o le tapatapa solo o le alii pule, mo le tau sailia o nisi e maua ane ai se fesoasoani mo ni faamatalaga e uiga i lea aiga.

O loo lototele le alii pule o le a toe maua lava lea aiga pe afai ae fesootai ane se tasi mai le toa 120 o tagata sa auai i le aiga o le faaipoipoga i lea aso. Ua tāpā foi e le kamupani se fesoasoani mai leoleo mo lea lava mataupu.

E ui lava i lea o loo mau pea le faatuatuaga o le pule i le mamalu o tagata lautele o le a fesoasoani ane foi i le mafatiaga o loo iai.

E mautinoa lava o le aiga lea e tau sailia e nonofo i le itu i Sisifo o Aukilani, ona o telefoni sa faaaogāina mo fesootaiga o le 09 838-4912, ma le telefoni feaveai o le 021-171-1819.

O le lua vaiaso talu ona lē toe foi ane le aiga lea e totogi le aitalafu, o le taimi tonu lava foi lea na motusia ai na laina telefoni mo ni fesootaiga.

Atonu ai o loo faagasolo pea le honeymoon a lea aiga fou, ae galo ai o le fili lava o le tama o le maua, ma e manaia foi ae toe faamae‘a le honeymoon a lea aiga fou i se nofoaga e pei o le falepuipui pe afai ua amata i le pepelo ma le faa‘ole‘ole le mafutaga.