O lafu mamoe, o lafu puaa, lafu povi ma moa, o atina‘e o faisua ma le anoano o atina‘e o fualaau aina, fualaau faisua ma meaaano – na molimauina mo aso e lua i le Faaaliga a Faifaatoaga, Failafumanu ma Tautai o le Gataifale na faatautaia e le Matagaluega o Faatoaga ma Faigafaiva i Samoa i le vaiaso na tea nei.
O le auga autū o le faaaliga o lenei tausaga, ina ia galue mo le tafiesea o le ola mativa ma ia galulue ina ia mafai ona unai le sao o Faatoaga ma Faigafaiva i le tamaoaiga o Samoa.
O le luitau tele i le Malo o Samoa e pei ona fofogaina i le tatalaga o lenei faaaliga e le Minisita o Faatoaga ma Faigafaiva, le Afioga Le Mamea Ropati, o loo tele lava le tupe a le atunuu o loo tau teu i fafo ina ia faatau mai ai taumafa mai i fafo.
O se tupe e tatau ona agai i atina‘e i totonu o Samoa ae ia sagai ane le atunuu e galueaina le eleele ma toe faasao ma atina‘e le gataifale.
E faitau miliona tala Samoa e alu i tausaga uma i oloa faatau mai i fafo, “…ae o loo fau ma soloi manuia tau taumafa e tatau ona maua i Samoa ae ua lē o le tulaga lea,” o se finagalo lea o le Alii Minisita, le Afioga Le Mamea.
Na ia ta‘ua o le unai lava lea a le Malo ina ia toe foi tagata o le atunuu e galulue auā e lē gata o se auala lea e tafiesea ai le ola mativa, e pei ona iai le faanaunautaiga uma o malo o le Lalolagi, ae ia mafai e fua o faaeleeleaga ma atina‘e o le gataifale ona fafaga le tamaoaiga poo le tupe maua a Samoa.
O le taimi lenei o le 10 pasene (%) o le tupe maua a Samoa i le tausaga o loo sau i fua o faaeleeleaga o loo faatau atu i atunuu mamao aemaise lava i Niu Sila ma Ausetalia, peitai o le faaiuga o le lima tausaga o le faigamalo o loo iai nei, ua iai se fuafuaga a le Minisita ma lana Matagaluega ina ia faaluaina lea aofai o tupe maua.
O se fuafuaga faataatia ua ta‘ua e le sui o le Itu Agai le Tautua Samoa, le Afioga Afualo Dr Wood Salele, ua maualuga tele ma ailoga a ausia ona o loo iai lava faaletonu i maketi i fafo ma e lē o toe atoatoa lava le lelei o le eleele ona o le tele o tausaga o fana le eleele i vailaau oona ma ua faama‘ia ai le palapala.
O le lē mautu mai o maketi i fafo e ui o lea ua tatala mai le tele o faitotoa, ua saga faafaigata ai lava le faasufi o le toatele e toe atia‘e. Ua manino lava le toatele ua faamoemoe i galuega e totogi ai i vaiaso, ta‘i lua vaiaso pe ta‘i masina foi.
Tau Saili le Malo i maketi mo le talo…
O le masina na tea nei sa faalauiloa ai e le Malo ua lē toe talia le ituaiga o le Talo Samoa Tasi (1) seia oo i le ituaiga o le Talo Samoa Lima (5) mo le faatau atu i fafo.
O talo nei sa unai mai lava le Matagaluega i le tausaga na tea nei e tatau ona matuā totō e faifaatoaga ona o talo nei o le a faatau atu i fafo aemaise i Niu Sila. Peitai e avatu i Niu Sila talo nei ae sau le faaaliga a maketi na maua mai ai avanoa mo lea matai‘ai a le atunuu, e lē maua lava le lelei o talo mai i Fiti.
O lea la ua toe faapea mai le Malo e agai pea e totō pe afai o iai ni faitotoa poo ni faleoloa i Niu Sila ma Ausetalia e talia ai ae o se galuega lea o le a faia lava e nuu latou poo faifaatoaga taitoatasi ona o lea ua lē manuia le taumafaiga na tuufaatasia e le Matagaluega mo lea maketi.
O le talo Niue lea lava e taumafai faifaatoaga ina ia toe faaolaola auā o le talo tonu lea na tupe silia ai Samoa i fua o faaeleeleaga faatau atu i fafo, a o lei aafia maumaga o le toatele i le faama‘i o le lega.
O loo malosi lava le lega i le talo Niue ma o le mafuaaga lena o le agai o Samoa ina ia maua nisi ituaiga talo mo le taumafa a le atunuu aemaise le taumafai ai e toe unai le faatau atu i fafo lea matai‘ai a le atunuu. Ua amata foi ona faaali le lē malilie o fai faatoaga na agai e matuā totō talo nei ae o lea ua lē manuia foi lenei taumafaiga.
E peiseai o le tasi lava lenei auala ua fati ai le toatele o faifaatoaga e pei foi ona o latou faaalia i le Faaaliga tele lenei i le vaiaso na tea nei, o le taumafai atu lava ina ia mafai ona atia‘e faatoaga mo le faatau atu i fafo, ae o lea lava feto‘i lea tulaga.
Ua fautuaina e le Matagaluega le mamalu o le aufaifaatoaga ina ia saga taumafai pea ma ia vaai i le faatauina o nei talo i totonu lava o Samoa. O isi afioaga e pei o Savaia i Lefaga ma Lotofaga, ua maua nisi o faipisinisi i Niu Sila faapea Ausetalia auā le faatau mai ai o a latou uta talo. Ona pau nei o auala ua mafai ai ona ave i fafo fua o faatoaga o nisi i le atunuu.
O le toatele lava o faifaatoaga o Savaia na faalauioa ma faatau a latou tiapula i le Faaaliga tele lenei aemaise o talo mai i maumaga o nisi o lea afioaga. Ua tele foi le ufi, o le manioka ma isi laau o maua ai taumafa masoā ua mafai ona vaaia le toe tele mai i le faaaliga o lenei tausaga.
Ua tele foi le fa‘i papalagi, fa‘i Samoa ma isi aufa‘i e lei tele ni tausaga talu ona totoina i Samoa. O le talomua le isi polokalame ua faatautaia i itumalo o le atunuu ina ia saga unaia ai faatoaga ma atina‘e faasao e pei o le faisua mai i gataifale.
O le faamoemoe lava ina ia faaauau le maua o taumafa ma ia aua ne‘i oo Samoa i faaletonu o isi atumotu ma isi atunuu tetele o le lalolagi, o le le lava o taumafa mo le afioaga.
