Maoa’e le toe foi o Christian Lealiifano i le Supa Lakapi

Christian Lealiifano - Photo: AFP Christiaan Kotze

Ua ese le amataga o le Super Rugby o lenei tausaga. O le masani o ‘au e lima a Niu Sila e amata saua i ‘au a Ausetalia. Ae e le o le tulaga lea ua iai nei, e na’o le Crusaders o loo mausali pea lona lelei i ‘au a Niu Sila, peitai e lei taaalo ma se ‘au a Ausetalia, ae o le Blues, Chiefs, Hurricanes ma le Highlanders e foliga faaletonu mai. O se tulaga ua sii ai le faamoemoe o le Rugby Australia ae goto le faamoemoe o le All Blacks ma le lakapi i Niu Sila. 

Ae solaumua le a’e o ‘au a Ausetalia i tama Samoa e to’alua, o Jordan Petaia mo le Queensland Reds ma Christian Lealiifano mo le Brumbies. O le sao o nei tama e eseese, aua o Petaia o le tama fou o loo ta’uta’ua lona malosi ma le talavou ae o Christian Lealiifano o le tagata tuai ua toe foi atu ile taaloga ina ua mavae tausaga na malolo ai mai le taaloga ona o gasegase na aafia ai.

O Lealiifano ua 31 ona tausaga, sa taalo i le ‘au a le Wallabies amata mai le 2013, ua 19 ana taaloga faavaomalo. A na leai gasegase na feagai ma ia semanu ua tumau ai pea o ia i le aufili a Ausetalia. 

O le tausaga 2016 i le masina o Aukuso na faamaonia ai le maua o Lealiifano i le kanesa o le Toto poo le Leukemia. I le isi lua tausaga na feagai ai ma ona togafitiga peitai, o lea ua toe foi mai ile taaloga. O se tulaga lelei tele mo le Brumbies. 

O lana taalo i le aso Toonai ile taaloga ma  le Chiefs e mata’utia. E lei alo ese ma le laina, o ana pasiga e pei o se ‘au le sa’o. Ae o le saoasaoa foi o lana tamo’e na matua paso ai le Chiefs. 

O le sefulu ai lenei o tausaga talu ona amata taalo Lealiifano i le Super Rugby. Na amata i le 2008 i le taaloga ma le Crusaders i Kalaiesetete i le numera #10. Na fesuiai ona tulaga e taalo ai mai le 10 ile 12 i nisi o taimi. 

O le 2013 na amata taalo ai Lealiifano mo le Wallabies i le taaloga ma le British & Irish Lions. O le toe ofi ai o ia i le ‘au mo le Ipu o le Lalolagi o se avanoa tele lea o loo iai nei. Aua e lē o iai se isi mautu e pea ma Bernard Foley ile #10 a le Wallabies.

Afai e faaauau pea le lelei o le taalo a Lealiifano ose tala fiafia lea mo Michael Cheika ma le Wallabies aua o le isi tagata mo le #10 o Quade Cooper, ae e mautinoa e lē o mautonu Cheika ia Cooper mo le Wallabies. Ua toe vaavaai nei iai Cheika ia Cooper ona e matua leai lava ma se isi e tau talafeagai mo le tulaga, peitai, o lea ua toe foi mai Lealiifano. 

Na ta’ua e le alii lakapi i le faaiuga o le taaloga ma le Chiefs i le Aso Toonai, o loo tumau pea lona mana’o e toe taalo mo le Wallabies. 

O lona naunautaiga lea. Ae na ia viia le faigofie o le taaloga a le Brumbies i Canberra “aua na alu i luma osofaiga a le ‘au”. O lona talitonuga, e manaia le taalo o tagata uma pe’a agai i luma le taalo a le ‘au. 

O le sao ai o Lealiifano i le ‘au a Ausetalia o le a mautinoa  ile isi tolu vaiaso o lumanai nei o le Super Rugby. 

O le vaiaso fou e taalo ai ma le Hurricanes on sosoo ai lea ma le Rebels i Melepone, o le a taaalo faafesagai ai Lealiifano ma Quade Cooper, ona sosoo ai lea o le taaloga ma le Reds e faafesagai ai ma Bernard Foley. O taaloga ia e tolu o le a toto’a iai le vaai a Cheika, o le a iloa ai foi le tulaga lelei o le taalo a Lealiifano ile auala o le a ia faatonutonu ai le taalo a le Brumbies.