E ‘afa ifo le sefulu ma le lua i le aoauli o le Aso Toonai na mavae atu nei, ua leai se ofi o lumāfale o le faleoloa, ua tau poloka ai ma le auala tele latou, e fa‘i o tagata ua laulaututu solo, a o nai tuaa sinasina ma le mamalu i tupu ma tamaalii ua alaala i o latou seetaga malu.
O le tupulaga talavou ua papatutu‘i ma tau lē ofi i luga o le stage lea ua solo mālie ai le musika a le DJ, ma milo solo ai ona o le fia vaai ma matamata ia i latou ia ua sauni mai e faafiafia pe a mae‘a le sauniga lotu na fai.
O le toatele lava o le mamalu o Samoa ua faapea ifo, tuai ona ooti le lipine ma tatala faitotoa, ae se‘i tofo taumafa o le Tianas.
O nisi foi o le mamalu lea ua afifio mai, e afifio ma papaaao i tulimanu e fā o Melepone, a o nisi e malaga mai isi setete o le malo tele, e iai ma le tausi ia Faaleava ma lona alii ia Vaifale Patolo mai le aai o Sini lea na fai ma fofoga o le aso.
Ona faafeiloai lea e Vaifale le paia lasilasi o Samoa faapea uo ma paaga mai isi atunuu, ma valaau faaaloalo ai i le susuga i le faafeagaiga taulagi ia Bishop Nonu, o ia lea na momoliina lapalapa a malo o le tala lelei e ala i le sauniga paia, ma faasolo ai loa le polokalame.
Na mae‘a ona ootiina le lipine, faasolo loa ma faafiafiaga. Na tatalaina e Darlene ma Savannah i la la siva faaatunuu, pese loa ma le tama o Soge ae sau ai ma le solo a alo ma fanau a Samoa o loo taalo i le aulakapi tele a le Melbourne Rebels.
Na leai se isi e tuumuli pe tulai ona o Tama Tatau ia na faia le faatafiti, a o faasolo le vai taumafa malulu ma le taumafataga māmā, ma taualuga ai fiafia i le sausaunoaga faa-Samoa a le tamaitai pule ia Ruby ma lona alii ia Tivoli.
Pe tusa ma le lua i le tolu selau le paia lasilasi o Samoa na ulufale ma tali le sua, ma faatau foi taumafataga i se tau taugofie lava ona o le Aso Faapitoa.
Na molimauina e la tatou auaunaga, le talaaao ane pea o le atunuu mo le fofoga taumafa e oo lava i le itula e ono i le afiafi.
Na maau ma milomilosia le aiga alii i faaaloaloga e masani ai aso tetele faapenei mo le aufaigaluega paia ma tatala ai le filialii ma le agaga faafetai tele ona o se aso matagofie ma le mataina.
E momoli ai le faafetai tele mai le afioga a Satele ma le faletua ia Aolele aemaise o le nofoaalo i le Melbourne Rebels, Tama Tatau, Apple FM, Len DJ Ideal, Samoa Times, le MC, Vaifale ma Faaleava Patolo, o Aiga uma, o uo ma paaga, aemaise o le mamalu o Samoa atoa na afifio mai e lagolagoina le faamoemoe, Faafetai, Faafetai tele lava, mo lo outou faaeaea, na mamalu ma maualuga le aso, ona o lo outou afifio mai, Faafetai Samoa, Ia manuia ou ala!
