Ua 54 nei tausaga o le soifua o le tina o Lusia Sio mai le nuu o Levi Saleimoa, o loo galue i le kamupani e gaosia uaea o taavale le Yasaki i Vaitele.
O le taunuu mai o lea kamupani i Samoa ia Me o le tausaga e 1991 na amata ai foi ona galue Lusia i le kamupani. O le nofoaga o le Tofa Mamao i Leauvaa o se tasi lea o nofoaga sa faagaioia ai le kamupani ina ua amata lana tautua i Samoa. O le nofoaga foi lea na amata ai ma le olaga galue o Lusia.
“Ou te faafetai lava a‘u i lenei kamupani aemaise o le tatou Malo ua mafai ona ou maua ai se seleni e fesoasoani i le tausiga o lo‘u aiga”.
O seleni foi ia na ta‘ua e Lusia sa fesoasoani ia te ia ma lona toalua i le totogiina o pili o lana fanau e toalima. Ua iu lelei aoga a lana fanau ma o le tasi o i latou o loo avea ma faiaoga. “Ou te manatua ou te amata i le Yasaki o iai isi nofoaga sa galulue ai isi o le au faigaluega, e pei o Matautu i Apia, o Laulii, ma Alafua”.
O nofoaga na sa amata ai le kamupani a o sauni le Malo e fausia se fale tele ua iai nei i Vaitele e siitia uma i ai galuega a le Yasaki.
Na faaalia e Lusia e tele luitau faigata sa feagai ma ia e pei o le solo tetee na alu i le 1994, ae na o lava isi o le au faigaluega i le solo tetee ae sa usu mai lava ia i le galuega.
Ua atoa le 20 tausaga o le Yasaki i Samoa ma ua atoa ai foi ma le 20 tausaga o galue le tina o Lusia i le kamupani. “Pe a toe vaai i tua i le amataga e lagona lava le faafetai i le Atua ua na aumai lenei kamupani ua maua ai si a‘u galuega ae faapea isi fanau a le atunuu.”
O le lui a Lusia i soo se tagata faigaluega, e lē faigofie le galue tauivi ma onosai auā e iai lava le aso e tauia ai le faamaoni.
O le taimi nei ua avea o ia ma se tasi o taitai i le galuega. O lona totogi foi ua $3 tala ma ona tupu i le itula, lea na amata e $1.20sene lona totogi i le itula. Na faaalia e le alii Pule le susuga Funefeai Oliva Vaai, o le 18 lenei o tausaga o tautua i le kamupani ina ua mae‘a nisi tausaga se tele sa galue ai i le kamupani vaalele o le Polenisia.
O lana molimau e tele faamanuiaga ua maua e nisi o alii ma tamaitai o Samoa ua siitia tulaga i le galuega a le Yasaki. E iai foi faafitauli i le feagai ai ma le au faigaluega, ae o faafitauli e mafai ona foia.
O lana fafetai i le Malo e avea ai ma sui o le kamupani ona o le vavalalata pea o le mafutaga ma le pulega o le Yasaki o loo mafai ona tua i ai i taimi o faigata.
O le atoa o le 20 tausaga o le Yasaki i Samoa o loo faamoemoe ia faaauau pea lana tautua o loo maua ai galuega a alii ma tamaitai talavou o le atunuu.
Faaalia e Funefeai e tusa ma le 7 miliona tala tupe o loo maua i le masina mai ana oloa o uaea o loo ave i fafo. Pe a fua i ai e tusa ma le selau miliona tupe o loo sasaa mai e le kamupani i le tamaoaiga o le atunuu.
