Adam Keighran – O lana sikoa i lana taaloga muamua mo le NRL ma le Warriors

O ‘ai maualuga ia o le vaiaso amata a le NRL na manumalo ai le Warriors i le Bulldogs 40-6. O le isi tulaga, ua iloa ai foi e lē o misia e le Warriors le taalo a Shaun Johnson. O le paga fou a Adam Keighran ma Blake Green i le #6 ma #7 na matautia i le taaloga muamua a le ‘au. 

O le taaloga muamua foi lea a Keighran, 21 tausaga, i le NRL. Mai le amataga o le taaloga na ofi gofie ai Keighran i le faatamoeina o le Warriors i Mt Smart, na maua loa ma le avanoa e kami ai ma sikoa lana sikoa muamua mo le Warriors, ae lei mae’a le ‘afa muamua. Na pati ma po le aumaimoa i le manaia o le sikoa a Keighran, ma galo atu ai lava ma Shaun Johnson. A’o lana paga i ona autafa i le numera #7 Blake Green na lelei foi la fesootaiga. O le lelei o le fesootaiga a Blame ma Keighram i luga o le malae, ua muta ai foi ma le fesiligia o se tagata agavaa e sui tulaga ia Johnson. 

O Green foi na saunia le polo manaia mai le a’a kolosi na sikoa ai Ken Maumalo. E matautia faiga a Maumalo, e 240 mita na tamoe ai Maumalo i totonu o le malae.  A’o le isi paga na lelei tele le la taaalo, o le kapeteni Roger Tuivasa-Sheck ma Solomona Kata i le itu taumatau o le malae. E tasi le sikoa a Tuivasa mai le faaseseina o le laina a le Bulldogs ma sao ai i le laina sikoa. A’o le isi na ia fafagaina ai le polo ia Kata e sikoa ai lana sikoa muamua o ana sikoa e lua na maua i le taaloga. Na faapea foi ma David Fusitua, o ia na pasia le polo ia Kata mo le isi ana sikoa. 

O Kata foi na fesoasoani i le sikoa a Nate Roache. I le foueti o Adam Blair, Bunty Afoa ma Lachlan Burr na tutū malosi i le tuleiina o le polo atu i luma. Na fesoasoani iai Leeson Ah Mau i le taimi na ofi atu ai i totonu.  E lei solomuli le Warriors i lana taumafai, mai lava i le amataga o le taaloga seia oo ina ua uma minute e 80 o le taaloga. 

O le faavae o le malo o le ‘au, o le sa’o o ana osofaiga ma gaioiga na faatino i le taimi atoa o le taaloga. A’o lelei o le Warriors e faapaleni lea i leaga a le Bulldogs. 

E ui na faaletonu le ‘au ae e maoae ai leleiga o le Warriors i le taaloga amata. E lei iai ma se taimi na faapea ai o le a suia le taaloga ona o le loto tasi o le Warriors, na tutusa le loto ma le auala na faatino ai le taaloga, faatasi ai ma le lelei o le fesootaiga a le #6 ia Keighran ma le #7 ia Green, ona maua ai loa lea o le atoatoaga o le matautia ma le maoa’e o le Warriors. 

A’o Shaun Johnson, na faia’ina lana ‘au i le po o le Aso Faraile i le taaloga ma le NewCastle Knights 8-14. O le vaiaso fou e  malaga ai le Warriors atu i Campbell Town e feiloai ma le Tigers. 

Warriors 40 (Sikoa – K Maumalo, S Kata 2, A Keighran, N Roache, R Tuivasa-Sheck, P Hiku; A Keighran 6 kiki ova)

Bulldogs 6 (C Crichton sikoa; K Holland – kiki ova)

‘Ai ina ua ta le malologa: 22-0

Taaloga uma o le Vaiaso 1  NRL 

Warriors 40 Bulldogs 6

Roosters 16 Rabbitohs 26 

West Tigers 20 Sea Eagles 6

Cowboys 24 Dragons 12

Panthers 12 Eels 20

Titans 0 Raiders 21

Storm 22 Broncos 12

Knights 14 Sharks 8