O le vaitau lenei o faiga taulaga a Ekalesia Metotisi ma le Ekalesia Faapotopotoga Kerisiano Samoa. O le vaitau foi lenei e fesiligia ai le moni o le si’uleo o loo faapea mai ua tele le mativa ma le lē tagolima i Samoa.
O le taeao o le Aso Toonai na tea nei na alo ane ai le Ekalesia Metotisi Magiagi ma le Ekalesia Faatoia i lana faiga taulaga. E tulaga ese le taupati ane o tagata lotu e faatino le latou osigataulaga. Fai mai se tasi olomatua o le ekalesia, o le aso lea i soo tagata lotu Metotisi e galo uma ai faigata ma le oi i le tau sailia o se taualaga ae sagai ane e faatino le mea e gata ai le malosi e ofo ai le taulaga. “O tu ma aga faa-Metotisi, a’o lei oo mai i le aso lenei, e muamua ona potopoto uma aiga poo tagata lotu, ona faapaia lea o taulaga, ona momoli mai ai lea.” O tu foi ma aga faa-Metotisi, e sisiva i le molimoliga o latou taulaga. O ulo, o atigi paelo, o mob, o sipuni, o faaili e matuā pisapisao i le molimoliina o latou taulaga. Ae e ese lagona o lea foi aso, pei ona ta’ua e se tasi o tamā. “Faamata fai mai nisi e faatauvaga, ae o le mea moni lava ia, e lē o se faatauvaga, ae o le foai ua masani foi ai le matou ekalesia.”
“E tasi le matou taulaga i le tausaga, ma o le taulaga lea ia Novema e ave uma iai.” Mo le ekalesia Magiagi lava e pei ona tolaulauina, o le taulaga maualuga lava na lafo e $25,000.00 tala mai i le Susuga i le Faafeagaiga Faavae Sooalo ma le Faletua ia Emi ma o la alo.
Ona sosoo ane ai lea o le ta’i $10,000.00 tala, $8,000.00 tala, $7,000 afe tala seia oo i le $500 tala.
I le tolaulaga mai i le sui o le komiti na faamaumauina le aaomafola o le aulotu, e 130,000 afe tala le aofaiga atoa o le taulaga a Magiagi i le tausaga na tea nei 2017.
O le tausaga lenei e lata i le 140,000 afe tala, o se faasiliga e $16,000 afe tala faatusa i le 2017. O le ekalesia Faatoia, ua faamauina foi le siitaga o le latou taulaga o lenei tausaga.
O le maualuga o le foai, e $31,000 tala, ma o le Susuga i le Tausi Matagaluega Pisopa Matatia ma lona faletua, ona sosoo ane ai lea o le foai e $11,000.00. Ona sosoo ane ai lea o foai ta,i $5,000 tala seia oo i le $100.00.
O le tuufaatasiga lava o le Ekalesia Metotisi Faatoia mo lenei tausaga $106,000 tala faatusa i le $103,000 afe tala o le tausaga ua mavae. E $3,000.00 le faasiliga. O le fesili o loo fesiligia nei, o faamaumauga a le ofisa o fuainumera faamauina o le census, o loo manino ai le pa’u i lalo o le faitau aofai o tagata lotu a le Metotisi.
Peitai a fua atu i le oso maualuga o lafoga a tagata lotu, o lona uiga o loo tumau pea ma tamau tagata lotu Metotisi i lo latou talitonuga ma ua masani ai. Ina ua fesiligia nisi o aiga e toalima o aulotu uma ia e lua, poo fea lea e maua mai ai le seleni e faatino ai latou taulaga, o le toatele na tali mai e faapea, e tai afe tala a latou tusaga poo saoga, ma e amata tuli mai lava i le amataga o le tausaga. O nisi e fesoasoani mai o latou aiga i fafo, o isi e faapolopolo lava a latou seleni e aveese mai i o latou totogi ma faaputuputu mai ai seia oo mai i le faaiuga o le tausaga.
O ia faiga e pei ona latou ta’ua e lē lagona ai so latou tigaina. O loo faagasolo isi matagaluega i latou faiga Me o le tausaga lenei.
