“Tautuana ma outou le fanau e faaolaola pea a tatou tu ma aganuu, o le tatou faasinomaga”
O lea ua toto i loto ma agaga o fanau lalovaoa a le atunuu i le faaaliga muamua o aganuu faasamoa ua faapitoa mo Kolisi ma Aoga maualuluga i lo tatou atunuu, e poo a lava suiga fou ua televave mai e le tuua le tiute o se faigamalo o le fafagu ma faamanatu pea le taua o a tatou lava siva ma pese, aemaise o isi vaega taua e pei o lauga faasamoa.
O le siva a le taupou, ma le aiuli o taulelea ma gaioiga a le fuataimi o pese faaleaganuu o nisi ia o vaega e sili ona taua e faananau pea i ai loto o tupu ma e‘e, faletua ma tausi ma Sa‘oao o le atunuu aemaise foi o aualuma ma aumaga. E le fesiligia le saoasaoa o suiga mai fafo ua lofia ai a tatou tu ma aganuu, ae a le faia ma fagufagu pea i tupulaga e le pine ae mou ese atu ma le toe maua.
Ua tatou silasila ma vaavaai i suiga ia tatou siva i nei aso, ma ua talanoa ai pea le au fai tofa ma le au fai uta o Samoa pe o le a faapefea ona toe silasila i se sausaunoaga a se taupou e faatino‘ao ma faamaneenee ana taga ae onomea ma siamu pe a see.
O le tuumalo talu ai nei o se tasi o tina o le atunuu sa mua i malae i le tofi faipule o le tatou palemene, na toe saafi ai le Palemia ma le Ao o le Malo i le saasaa a le afioga Leaupepe Taulapapa Faimaala Fuatino, i aso o lona talavou i ni sauniga tetele a le atunuu aemaise o sauniga masani e pei o ni taalolo i ni faaulufalega. O le taumafaiga lea a le Malo e pei ona saunoa le Palemia susuga Tuilaepa L Sailele Malielegaoi, ia toe aumai vaaiga ia ua mou atu ona ua tele suiga fou mai fafo ua satia ai ma a tatou measina e pei o siva ma pese.
O le uluai faaaliga o aganuu faasamoa a Kolisi maualuluga i lo tatou atunuu i lena vaiaso ua mavae, sa toe vaaia ai ua logosaia e faiaoga o kolisi sa tausinio fautuaga a le komiti a le Matagaluega o Aoga Taaloga ma Aganuu sa tapenaina le tauvaga ma le faaaliga, le tatau ona faatino vaega togia o le faamoemoe ina ia maua pea le agaga o le faaaliga ia aumai a tatou lava tu ma aganuu faasamoa i le faatinoga o le siva mauluulu, le aiuli ma le saasaa a le taupou Samoa.
E maeu tapenaga a aoga taitasi ona sa molimauina e le toatele e muliga foi siva faaleaganuu i vaiaso o le Teuila i siva a kolisi na auai. Palasi ane i saasaaga a taupou ma aiuli ma fuataimi aemaise o lauga faasamoa e lei faapaole tapenaga. I le 12 o kolisi ma aoga maualuluga na tauva, e lei faamanuiaina uma i tulaga ma faailoga aua o le upu masani lava e toatele e valaaulia ae toatasi lava e filifilia.
O se galuega faigata na feagai ma faamasino o ni tamaitai o le atunuu ua iloga foi lo latou silafia ia tatou aganuu, e pei o le susuga Seiuli Vaifou Temese mai le vaega o aoaoga o le gagana ma aganuu faasamoa i le Iunivesite Aoao a Samoa. O le faletua o Palanitina Tupuimatagi Toelupe, ma le afioga Foisagasina Eteuati Shon.
O le Kolisi o Avele ua sola ma le manumalo o vaega o le faaaliga e pei o le siva mauluulu, manumalo lana taupou, ma toe manumalo foi i le tauvaga o tala faasamoa. O le Kolisi o Samoa na manumalo i le aotelega o le tauvaga i faafiafiaga faasamoa poo le overall winner.
O le siva sasa na sola le manumalo ma le Kolisi o Lefaga, ae manumalo le Kolisi o Uesele poo Wesley College i le tauvaga o aiuli. O le Kolisi o Samoa na manumalo lana fuataimi ae o le Kolisi o Sagaga ua siamupini lana lauga faasamoa.
E maeu le matagofie o lea faaaliga aua e ui lava ina faapea ua pei ua lasi le silasila i nei faafiafiaga i le Teuila, ae o le finagalo o le Palemia e taua tele le iai lava o se faaaliga e faatauvaga mo kolisi ma aoga maualuluga i le atunuu.
E leai se kolisi mai le motu tele i Salafai ona ua vave le taimi ae o le tausaga fou lea ua mautinoa o le a le toe nofoai Salafai ae oso i totonu o le maea mo sona avanoa e lui ai manumalo o vaega togia o le faaaliga ma le tauvaga o aganuu faasamoa a kolisi o lenei tausaga.