O le susuga i le faifeau Toeaina ia Taipo Malifa o le Pulega a Sini Saute i le setete o Niu Sau Uelese a le Ekalesia Faapotopotoga Kerisiano Samoa i Ausetalia, sa ia tatalaina le amataga o le Mafutaga a Tina i se sauniga lotu puupuu i le aso Toonai 8 o Aokuso 2009.
Na maea ona tulai lea o le faletua ia Ataataoletaeao Mareko, le failautusi o le mafutaga e faafeiloai ma tatalaina aloaia le faamoemoe o tina i lea po i le YMCA hall i Greenarce.
Ta’ua e le failautusi o le mafutaga, o le agaga moni ma le autu aemaise le auga o aute o lenei tuufaatasiga o Tina uma o le Pulega, ina ia tumau ma mausali ai pea le ola galulue ma felagolagomai i le galuega a le Atua i totonu o falesa taitasi.
O le polokalame faagasolo i le tulaga o faafiafiaga na tatalaina aloaia e Tina o le mafuta EFKS mai Bankstown i le faletua ia Faasuka Paulo ina ua ave i ai le faatomuaga o siva faaleAgaga ma siva faaSamoa lea na taitai mai e le tina ia Taumaave Seiuli Ainuu, sa sosoo mai ai ma le faletua ia Heather Keilani ma le mafutaga mai Liverpool i le taitaiga a le tina ia Daisy Tevao, o le faletua ia Tolopo Lemalu i le pese o le pipili ma le mafutaga mai Moorebank i lo latou taitai ia Seepa Tuifao, o le faletua ia Mala Semaia ma le mafutaga a Condell Park sa faaulufale mai e le tina ia Sa Pepe, ao Canterbury i le faletua ia Faaesea Leleimalefaga ma le mafutaga na taitai mai e le tina ia Leata Tovale.
O le faatafiti o itu e lua i le faaleAgaga ma siva faaSamoa sa feagai ma le mafutaga mai Camden i le faletua ia Ataataoletaeao Mareko ae taitai mai e le tina ia Tio Tupu Natapu, ae o le taualuga na matua fuli ai le tina ia Sopa Letoa Toafa mai Lalomanu Aleipata e toe faaiila lana taleni o le pese lea na amataina ai le latou faafiafiaga a le tamaitai lauiloa i ata tifaga o Sister Act i le gagana Samoa.
Sa molimauina e talafou le maoa’e o le tulaga ua oo i ai le tomai o tina i mea tau faafiafiaga i le itu i le tino ma le itu faaleAgaga e le gata i pesega a Michael Jackson e manatua ai lenei alii pese lauiloa i le lalolagi, ao sikaili fou i siva faaleaganuu.
Ta’ua e le afioga ia Laulu Galala i le sui o le Samoa Times e faapea o se tausaga sili atu lea talu ona faia ma faataunuuina lea ituaiga mafutaga a tina e tuufaatasia ai Tina uma o le Pulega mo le lumanai manuia o Ekalesia. Aua e talitonu a ia o le faamoemoe ola lea o soo se mea o Tina Samoa ma e le o lilo lava lo latou gagana faifaipea ma tala tuutaliga; “E au le Inailau a Tina”
O le siui o le faamoemoe sa saunoa ai Sitaua Malifa o le taitai o le Mafutaga a Tina o le Pulega e toe faafetaia ai mafutaga a tina uma mo le latou lagolagosua, ae o Faaesea Leleimalefaga o le teutupe sa tulai mo le tolaulauina o le seleni sa maua i le po, lea e lata atu i le $7,000 tala. Sa fetalai le tausi o Teta Leafa Auelua e faafetaia ai Samoa potopoto i ona tulaga faalupeina faapea le susuga i le Toeaina ma le vasega o faifeau ma isi usoa ekalesia i lo latou maau ma le milomilosia ua maualuga ai lo latou faamoemoe.
Na saunoa faafetai le afioga i le tiakono ia Sala Amosa Vaifale mai Liverpool ma Samalaeulu Savaii e fai ma sui o Samoa e faamalo ma faafetaia le mafutaga a tina o le Pulega.
O le faifeau malolo mai Samoa le susuga ia Simalu Kovati o le faafeagaiga taulagi o le ekalesia EFKS i Taga Savaii sa fai ma sui o lona faletua ia Nefu e momoli le agaga faamalo ma tatalo faamanuia ai loa ma tatala ai le filialii i le manuia o le po fiafia a le Mafutaga a Tina EFKS i le Pulega Sini Saute.
