E lē o se taimi muamua lea ua silasila ai ma maimoa le mamalu o le atunuu i faafiafiaga a le ausiva o Le La o Samoa, le afioga i le tamaitai pule, Sia Su‘a ma le vaega.
O le aave o tala i lea aufaafiafia, sa avea ma mafuaaga o le lē ofi o le nofoaga a le Apia Way i Magele, i le po sa faapitoa mo i latou lava.
O le toatele o tagata ma valaaulia na maimoaina le po o le Aso Toonai na tea nei, sa matuā faamalieina ina ua mae‘a lea faafiafiaga tele sa faia ai.
E lē gata i le lava tapenaina o siva ma pese a tamaitai faafiafia, ae sa tosina foi le toatele ona o alii pepese iloga sa auai ma fesoasoani i le faamoemoe.
O le afioga ia Tolumaanave Misiluki Su‘a, Pagamalie Iopu Faivalu, Etelona Ioasa, ma Lady Akau sa taualugaina ma mālie ai lea lava po.
O nisi o molimau sa auai i lea faafiafiaga na ta‘ua le faatumulia, o le mamalu o le auvalaaulia aemaise o i latou sa auai, ma na fetaui lelei lava foi ma tapenaga a Sia Su‘a ma le vaega a Le La o Samoa.
O se ausiva sa amata mai i se fuainumera toaititi, peitai ua agai pea i luma ma ua tulai mai o se au faafiafia toatele i le taimi nei.
O le taimi nei ua toaiva tamaitai, ae toavalu alii ua tuufaatasia ma atinaeina lea foi tautua.
O le afiafi o le Aso Toonai lea, aso 12 na faia ai le latou faafiafiaga lenei, ae muamua atu sa faafiafia ai foi i le Pasifika Festival i le aoauli o lena lava aso, i se valaaulia sa talosagaina ane e le komiti o Faaliga o Tu ma Aganuu a le Pasefika.
Ta‘ua e Sia e faapea, o le autū ma le sini o tapenaga ma sailiga seleni e pei ona alo i ai le ausiva, ona o loo sauni atu mo le faataunuuina o se isi vaega o le tautua i le masina o Iuni, aso 25 o le tausaga nei lava.
O lea faamoemoe o le kamupani ma le ausiva, o le tatalaina lea o le vaega lona lua o le MTV, poo le maimoaina lea i luga o le televise, o gaioiga ma faafiafiaga.
Ua mae‘a ona tatala le vaega muamua, peitai o le vaega lona lua lea ua sauni atu i ai. O se faiga sa molimauina ma ua faatupulaia le fiafia i ai o le toatele, ona e lē gata o le faafofogaina o pese ae o le a silasila foi ma maimoaina gaioiga uma a tama ma teine faafiafia.
O lea lava foi po sa faataunuuina ai ma le se‘i sa faapitoa lava ma ofoina i ai nisi o galuega mai le fale su‘isu‘i a le tamaitai ia Sia Su‘a.
O le manumalo o le se‘i i lea po sa manumaloina le su‘i fua o le laei e le kamupani su‘isu‘i e lē totogia.
O le tulua sa mauaina se faailoga o le a tauaaoina ane ai se ie na te filifilia lava e ia, ae o le a su‘i ma tuufaatasia e le kamupani su‘isu‘i a Sia, e lē totogia foi lea galuega.
O le kamupani a le susuga ia Titiula Tuigamala, le Pacifica Digital, o loo nafa ma le pueina o faafiafiaga a Le La o Samoa ma ana fuafuaga mo le lumanai.
O le faaiuga o le talanoaga ma le tamaitai pule ia Sia Su‘a, sa ia faaaogāina ai lenei avanoa e momoli ai lana faafetai tele mo le mamalu o le atunuu sa agai ane ma molimauina taumafaiga a le ausiva.
Saunoa Sia, o le lagolago a le atunuu e tāua tele, ma e lē mafai ona tuuina i lalo lea vaega, auā o loo fesoasoani tele mo le faataunuuina o moemitiga ma faamoemoega sa tuufaatasia ai nisi o alo ma fanau a Samoa o loo i totonu o Le La o Samoa Dancing Group.
Saunoa foi Sia, e toe tasi se isi faafiafiaga o loo tapenaina i le taimi nei, a o lumanai ai le faamoemoe tele mo le MTV, ia Iuni e pei ona fuafuaina.
