Na ela le silasila a le faamasinoga maualuga na suesueina le talosaga a le afioga Patele Muli’au Stowers ma ona uso o Tupa’i Farani Mulitalo Poe Stowers, ma Afa Mulitalo Poe. O le taunuuga lea o galuega a le faamasinoga o talosaga toe iloilo poo le Faamasinoga Apili i le talosaga na toe tuuina atu e le itu talosaga i le faai’uga a le Faamasinoga Maualuga na fofogaina i le tausaga nei, na teena ai le tagi o le tau faaleaga faasaga ile faasalalauga na faia i luga o le TV1 i Mulinuu ia Aukuso o le tausaga e 2016, faapea ma le tagi faasaga ia Julianne Stowers na ia ave le faasalalauga i le fale televise e pei ona ta’ua. O le faasalalauga lea na mafua mai i le su’esu’ega na faia e le ofisa o le Malo o loo faamauina e fananau, o e maliliu ma faaipoipoga na taofia ai le toe faaaoga e le itu tagi o le faaiu o le aiga o le au Stowers i Lano i Savaii ona e leai se piitaga tau toto, gafa poo se vaegatama (adoption).
I le silasila a le faamasinoga apili o mau faamaumauina poo pepa mai le ofisa o le ekalesia Katoliko na lagolago ai mau a le itu a Muli’au ma ona uso e lei mamafa iai le silasila a le faamasinoga maualuga i lana faai’uga, ae ua mamafa i mau tuu fofoga a molimau e toalua a le itu na faasaga iai le mataupu, o le tina matua o Meipo ma le tina o Silifono Vui. Fai mai le faaiuga a le faamasinoga apili o faamaumauga mai le ekalesia katoliko oni molimau taua i le suesuega na faia, ae o mau tuu fofoga a molimau e toalua e pei ona ta’ua, e iai vaega e mafai ona talitonuina ae o isi foi vaega oni mau faalogo poo le hearsay evidence.
O gafa na tuuina e itu auai o le mataupu mo se suesuega mae’ae’a a le faamasinoga o talosaga apili na mautu ai le finagalo o le faamasinoga o Muli’au ma ona uso o suli moni e au i le faaiu o le aiga o le au Stowers i Lano. E faavae lea i le gafa amata mai i a John Stowers ose alii mai Egelani Peletania na taunuu i Samoa ile tausaga e 1839. Na faaipoipo i a Maria poo Malia ose tamaitai Samoa o le nuu o Lano. O John ma Maria e toatele se la fanau e aofia ai Charles e iloa foi i le suafa o Sale poo Salesa na fanau ile tausaga e 1848, ma le isi atalii o Harry na fanau ile tausaga e 1870. O le aso 9 o Oketopa 1871 na fanau le isi atalii o Paulo poo Paulus Paulo, e iloa foi i isi suafa o Sua Paulo ma Paulus Sua. O le laina o Paulo e fananau mai ai le itu talosaga poo le susuga Muli’au ma ona uso e toalua. O Paulo ma lona toalua muamua o Talaesea e toalua le la fanau, o Farani ma Petelo. Na maliu Talaesea ona toe faaipoipo lea o Paulo i le isi ana ava o Asia o Ga’utavai ile tausaga e 1924. E toafa le la fanau o Fonofili, Paulo II, Palepa ma Poe.
O le tausaga e 1950 ile masina o Oketopa o le tausaga e 1950 na maliu ai Paulo, ae sa nonofo ai pea lona aiga i eleele o le au Stowers i Lano e aunoa ma lo latou faaaoga o le faaiu o le Stowers. O le tausaga e 1992 na amata ona tulai mai ai ni suiga ina ua faatino e le itu talosaga ma lo latou aiga ni suiga i faamaumauga i le ofisa o pepa fanau, pepa mo e maliliu ma faaipoipoga. O le tausaga e 1992 na faamauina ai e le tina fai (adoptive mother) o Muli’au le tina o Fonofili le faaiu Stowers mo Muli’au ile ofisa o pepa fanau. O le tausaga lea na amata ai ona faaaoga e Muliau le faaiu o le aiga. O le aotelega o le silasila a le faamasinoga e manino mai i faamaumauga na tuuina atu e le itu talosaga ile suesueina e le faamasinoga maualuga o le mataupu oi latou o suli mai a Paulo poo Paulus Sua o le au Stowers i Lano.
I le isi vaega o le mataupu o le tuuaiga o le tau faaleaga o le faasalalauga na faia i luga o le TV1, ua silasila foi le faamasinoga e faamaonia. Ua faia ai le poloaiga e faaleaoga le faaiuga atoa a le faamasinoga maualuga, ae toe ave le mataupu a le itu tagi poo le itu talosaga ile faamasino na ia faia e silasila ise totogi talafeagai e tuuina atu i le itu a Muliau ma ona uso ona o le faaleagaina oo latou tagata i le faasalalauga.
E tasi le miliona tala o loo su ai e le itu talosaga le fale televise, peitai o se iloiloga a le faamasinoga maualuga o le a mautu ai pe maua atoa le tupe ua su ai le TV1 pe o se isi aofaiga o le a tuuina atu e taui ai le tau faaleaga o le faasalalauga. O le tamaitai loia o Tima Leavai sa tulai mo le faletelevise, o le susuga Alex Su’a sa tulai mo le itu a Julianne Stowers, ae o le alii loia o Shane Wulf sa finauina le mataupu ile faamasinoga maualuga faapea ma le talosaga apili.
