O le alii o Salatielu Taotua (T.J.) na manumalo i ni faailoga se lua; o le Alii Pasefika pito sili i le taleni pese (Best Pacific Male Artist Award) ma le faailoga lona lua o le Atisi pito sili i viiga faale-Talalelei (Best Gospel Artist Award) i le Aso Toonai 13 o Iuni na faia ai lenei tufaga faailoga mo le Pasefika atoa i Aukilani.
Na usuina e Salatielu le pese o le Magnify na tusia e si ona uso o Vini Taotua (maliu i le 18 tausaga) e faamanatu ai pea o ia, lea na manumalo ai i pese faale-Tusi Paia.
O le taleni pese a Salatielu na amata mai lava i totonu o le ekalesia Metotisi i Porirua, ma sa avea o ia ma ta kitara ma le piano i le faaili mo viiga o le Atua i le ekalesia AOG i Porirua. O Porirua na amata mai ai lona tuputupu a‘e ma lona olaga aoaoina seia faasolo atu i le Kolisi a St Pats i Ueligitone ma agai atu ai i le iunivesete i Vitoria ma maua ai lona uluai faailoga B.A. Na faauuina lona taumafai i le faailoga o le Master in Business Administration (MBA)i le 2013.
Na tumu foi le tapuaiga a lona aiga i le po na tufatufa ai faailoga o le Pasefika ma o se fiafiaga sili lea ina ua faamanuiaina lona olaga taumafai i le pese, aemaise lava le fiafia i viiga tau le Atua. O Salatielu foi o se uo mamae a Jerry Collins sa la taalo faatasi i le lakapi i le kolisi a St Pats i Kilbirnie Ueligitone.
O le tausaga na tea nei na umusaina ai lana CD pese i viiga o le Atua i totonu o le Arena i Porirua, lea sa malaga mai ai le toatele o ana uo ma aiga e molimau lea galuega lelei ma le tāua. Faamalo atu Salatielu Taotua i lou filigā e faaiila pea lau taleni vivii i le Atua. E momoli atu faamanuiaga mai ou aiga i Salelologa ma Satupaitea ma Palauli faapea aiga i Aotearoa
