O le afioga ia Sala Lemi Ponifasio, ua manumalo ma ua tauaao atu i ai le faailoga maualuga, o le atisi sinia a le Pasefika (Senior Pacific Artist Award) e pei ona tufatufa ai faailoga ma faamanuiaga a le Creative New Zealand Arts Pasifika Awards. O le afiafi o le Aso Lulu, 14 o Novema, na faia ai lenei sauniga tāua i Ueligitone.
O Lemi Ponifasio e pei ona lausilafia ai, o ia na faavaeina ma o le faatonu foi lea o se tasi o kamupani i Niu Sila, ua ta‘ua o le MAU, ua lauiloa foi lona igoa i atunuu tetele o le lalolagi e pei o Europa ma Asia ia latou faafiafiaga i le tomai o siva ma tala faatino.
O lenei tamalii o le atunuu ua matuā lava lona silafia i le faatinoina o taleni siva i se faiga e faaaogā tu masani ma aganuu faa-Polenisia e faatino ai se faaaliga i taga ma vaaiga faaonaponei, ae o loo afifi ma momoli mai ai se feau tāua i soo se mataupu e aogā i le soifuaga, aemaise lava i mataupu faapolokiki ma le siosiomaga.
Ua tele atunuu o le lalolagi ua malaga i ai Lemi/MAU mo le momoliina lava o nei tomai ua faamanuiaina ai. Talu ai nei foi sa ia taitaia ai le Opera Prometheus i le faaaliga tele sa faia i Siamani, le Ruhrtriennale Festival, o faaaliga o musika ma tomai eseese faaatisi (music & arts festival). O se tasi lea o ana galuega ua aave mai ai tusitusiga a Tusitala i Europa i lona matagofie ona faatinoina.
Ae o lana faaaliga lea ua manumalo ai i le faailoga maualuga, o le Birds with Sky Mirrors, o se tasi o tala faatino a Lemi, ua sili ona fia maimoa i ai le toatele o tagata e lē gata o Niu Sila, a ua faapena foi ona viiviia e i latou mai Europa e fiafia tele i nei tomai. O le “Birds with Sky Mirrors na pito i sili ona fiafia i ai le aumaimoa i le taimi o ana faaaliga i Ueligitone i le amataga o le tausaga nei ma na tulaga muamua ai foi.
O le MAU na fofoa mai le tausaga e 1995, ma na maua mai lona igoa i le MAU a Samoa, lea na latou finauina ai so latou lava malo e pulea tutoatasi e Samoa. Ua tele ni faaaliga faavaomalo ua ofi atu i ai le MAU, e pei o le Edinburgh International Festival, Theatre de la Ville Paris ma le Venice Biennale.
Na manumalo foi o ia i se tasi o faailoga maualuga o le Arts Laureate Award i le tausaga talu ai 2011 a Niu Sila. O le tausaga 2004 sa ia maua ai foi le faailoga o le Contemporary Pacific Art Award i le Arts Pasifika Awards i lena tausaga.
O le Creative New Zealand Arts Pasifika Awards, na faavaeina mai le tausaga e 1996, o se polokalame ina ia faamanatu ma faatāua ai le tāua o tomai ma mea iloga ua ausia e tagata Pasefika i tomai tau atisi.
E pei ona saunoa le taitaifono o le Pacific Arts Committee a le Creative New Zealand, Pele Walker, ‘O nei faailoga mataina ua faamanatu ai atisi a le Pasefika, ua telē so latou sao ma avea a latou galuega ma toma i faaatisi, ua faamatagofie atili ai lea vaega o Niu Sila. O mea ua ausia ma faatino e nei atisi faapea foi isi o loo fotuai mai, ua atili ai ona iloga ma malosi le toe faaolaola ai i Aotearoa, o taleni tau atisi a le Pasefika, o a latou aganuu ma faasinomaga ua mataulia ai i latou.’
E momoli atu ai foi le faamalo ma faamanuiaga a le Samoa Times i le Afioga Sala Lemi Ponifasio mo faamanuiaga ma tomai ua faaeaina ai.
