E toalua ni alii o loo galulue i le faletalimalo o le Tanoa Tusitala i Sogi ua faamanuiaina nei i ni pine taualoa mai i se tausinioga o le gasesega o taumafa. O nei faailoga na maua e nei alii i se tausinioga a i latou e gasesega taumafa i faletalimalo eseese ole Pasefika. O alii nei na fai ma sui o kuka i faletalimalo o Samoa mo lea tauvaga.
O i laua uma foi e galulue i le faletalimalo i Sogi, o le alii matua ia Filo Tupo na maua pine auro e lua mai i le taumafa ua gasese mai i i‘a ma figota o le sami ma le isi taumafa na ave i ai vaega eseese e gasese ai ae pule ia i le taumafataga e mafai ona gaosi mai ai.
O le alii laititi ia Alofiaga Tasi Sone na manumalo i le pine apamemea i le gasesega o le supo ma le aotelega o taumafaiga a kuka i lenei tausinioga.
O le alii lenei sa amata galue i le faletalimalo i Sogi o se fufulu ipu, amata mai ai lava ona teu atoa le umukuka ma faamamā ae na faaaogā lona taimi e avanoa e faataitai ai ma fesoasoani i le gasesega o taumafa mo le faletalimalo.
O lea la na ave ai loa e le pulega o le Tanoa Tusitala le avanoa e amata ona galue ai o se kuka ma iu ai ina faaofi lona igoa i le tausinioga lea na faia i Fiti.
O le alii o Filo Tupou na amata mai lava foi a o faatoa ofi atu i le faletalimalo i le fesoasoani i le gasese o taumafa i nisi ua iai le tomai faapitoa i lenei auaunaga faafaletalimalo ma faafaleaoga.
O le iloa lea na faaauau ai ona galue ae e leai se isi o nei taulelea ua maua ni faailoga i lenei tomai o le gasesega o taumafa.
O le mafuaaga lea o le faafetai o le pulega, i le mafai ona ausia e nei alii o le maualuga e pei o pine auro faapea ai ma pine apamemea i lenei tausinioga a atunuu o le Pasefika ma ana tagata kuka. O se tasi lenei o taleni ua vaaia le faalautele e tauvaga ia ua vaaia i atunuu tetele o le lalolagi i le taumafai lava e saili taumafa aupito i lelei ma maualuga lona gasesega i soo se vaega o le kelope.
Mo Samoa lava ia ua iai le fesoasoani ua maua e le alii gasese taumafa lauiloa o Robert Oliver lea ua lua ana tusi o taumafa Samoa ua tuufaatasia ma lomia mo le lalolagi e silasila i ai. O loo i Samoa i lenei foi vaiaso lea alii ma o loo galulue ma le Faalapotopotoga o Tamaitai Faipisinisi i isi foi auala ua unaia ai fua o faatoaga o loo totō ma faatau atu e sui o lea Faalapotopotoga e lē gata i Samoa nei ae faapea foi i faleaoga ma faletalimalo i le atunuu aemaise atunuu i fafo.
Mo le pulega a le Tanoa Tusitala, o alii nei e tatau ona agai i le maua ai o tusi taualoa o lenei taleni peitai e lei faigofie le taumafai e ofi atu nei alii i ia aoaoga e pei ona vaaia i le Kolisi o Matata Eseese a Ausetalia le APTC ae ua avea lava le galulue faaauau i le faletalimalo ma auala ua siisii ai pea le taleni mo nei alii ma le faamoemoe o le a faaauau lea tomai mo le tali ai o malo asiasi mai i Samoa.
