Manumalo pea le itupa tamaitai i sikolasipi a le Pasefia

I se sauniga faapitoa na faataunuuina i le Pegasus Health i Kalaiesetete mo le tufatufaina o faailoga sikolasipi lea na tuuina mai e le sosaiete o le soifua maloloina, Pegasus Health Canterbury mo tagata Maori ma le Pasefika e le gata o loo aotauina i le mataupu tau soifua maloloina ae o loo galulue foi i lea matata. E toalua ni tamaitai Samoa sa faamanuiaina ai faapea le toalua mai Fiti ma Tonga atoa ma le isi toafa o Maori.
Na taitaia le sauniga lotu e le Afioga Patele Paulo ma na faatasia foi le mamalu o le atunuu aemaise aiga o le aufaauu, na auai i lea po le taitaifono o le fono faufautua a Samoa, susuga Su‘a Tagaloa Nua Su‘a, afioga Pouli Ioane aemaise sui o leitio faasalalau, Moaga Teevale ma Peilua Lam Sam atoa ma valaaulia.
O le alii pule o le Pegasus Health Dr Martin Sears na saunoa faalaeiau mo le taumafai o nei tamaitai uma e toavalu ua maua sikolasipi ma ia faamamafaina ai le taua tele o sikolasipi e unaiina ai le taumafai ina ia taunuu i le faamoemoe o loo lolo i ai mafaufauga faaleaoaoina.
O se fesoasoani tele foi lea i le itu tau faatupeina o le pili atoa ma meaaoga ina ia tau lau o le naunautaiga aua ua falute mai suiga o matagi i nei aso aemaise le itu tau faasoasoa o le pau maualalo o le tamaoaiga.
O le alo o le atunuu Peter Reitimanu, sa lagolagosua mo le tauaaoina o faailoga sikolasipi ma na ia faalia foi lona agaga fiafia i le taumafai o tamaitai ae maise lava alo e toalua o le atunuu i le tauivi ma le tinou ina ia maua.
O se tasi o le aufaauu, o Malu Tulia o se tamaitai faiaiga, e iai foi nai ona alo laiti ae sa taumafai pea e faalaolao taimi mo le taumafai, ua faauuina i le National Diploma in Mental Health ma lana sikolasipi e faauau ai le taumafai, o loo galue o ia i le Pacific Trust Canterbury i le taimi nei.
Na taua e Malu i le tusitala le tele o luitau sa fetaiai ma ia ona seiloga e momoe si ana fanau i le po, ma faatulaga fuafuaga faaleaiga i ona tiute faatina, ona faatoa tago lea e tau vaai sana meaaoga ina ua tuleva le po, e ui i sona le lavā ae e lei taotaomia ai lona naunau ma o se mea faigata lea sa oo ia te ia, ae faafetai i le Atua i le fesoasoani i lona taumafai.
Sa faapena foi i le tamaitai o Elena Moevao, o loo aoga i le mataupu tau nursing i le Canterbury Institute of Technology, ua ia maua foi le sikolasipi mo lona taumafai, o se fiafiaga lea i nai ona matua ma aiga sa faatasia ai i lea afiafi.
O le afioga Pouli ma lana pisinisi Catering sa saunia le fofoga taumafa o lea afiafi ia ma faafetaia ai foi lenei tamalii tausaafia o le atunuu ona o le tele o lona sao mo nai o tatou tagata.
Na taape fiafia lena afiafi ona o taumafaiga matagofie a nei tamaitai uma e toavalu e ui ina faiaiga ae sa afisi lava le tamaititi ma taumafai e tauivi i lana mataupu tau aoga.