O se tasi lenei o mataupu faaleaoaoga, poo taleni ua maitauina le toatele o alo ma fanau Samoa o taumafai e saili lumanai ai i nei atunuu. O nisi lava fanau e tumau le finau ma faaeaina, a o nisi e fiu gofie ona o luitau e feagai ai.
O le vaiaso na tuanai atu na faataunuu ai se faaaliga tele o ata tusi ma teuteuina a se tasi o kolisi i le aai o Melepone, Gladstone Park Secondary College, mai le tausaga iva (Year 9) e oo i le tausaga sefulu ma le lua (Year 12).
E tele ma anoanoai ata ma valivaliga eseese na tauva, e pei ona lausilafia le faatulagaina o tauvaga faapenei, e fai i vasega eseese (year level), ma le eseese o mamanu faatasi ma le teuteuina ma lona matagofie, atoa ma le tele o nisi ituaiga o tusigaata e pei o le Engineering Art, Design Technology Art, ma isi lava mamanu eseese.
Na maligi loimata o le olioli ma le fiafia o le tina ia Maria Tuua, ina ua manumalo le ata a si ona alo o Francis Tuua, i le vaega a le Multimedia Animation Art. Na faaalia le agaga fiafia tele o le alii o Francis ona ua iu manuia lona taumafai.
E toalima isi alo Samoa na tauva ai ma faalauiloa a latou ata. Talosia ia avea o ni taleni e faaeaina ai o latou lumanai.
