E faamata o ai se e manatu faapea o le taaloga lakapi ma le sasala o le manogi o le fasimoli taele mo le itupa o alii e lē o gatasi? O le amataga o le vaiaso talu ai na faatasi atu ai ni tama aoga taaalo lakapi e toaono mai le kolisi o St Thomas, Charlie Latulipe, Kasiano Petelo (Samoa), Mathew Elia (Samoa), Thomas Scott, Caleb Reweti & J.Kolomatangi (Tonga) mo le tauvaga a fanau aoga Pasefika i mataupu tau atinaeina o pisinisi e fofoa mai lava i o latou mafaufau. Ua avea nei tama talavou ma sui o aoga a le motu i Saute ina ua latou manumalo ai i le regional final ma malaga atu i Ueligitone mo le sailia o le siamupini faatasi ai ma isi fanau aoga mai isi itumalo o Niu Sila.
O le faailoga na tauva i ai, o le Pacific Young Enterprise Scheme Award (YES), lea la ua faamanuiaina ai i latou faatasi ma le faailoga maualuga o le Pcific Achievements Award mai le matagaluega o Tagata Atumotu o le Pasefika i Niu Sila (MPIA). O le auga o lenei polokalama e pei ona tauva i ai fanau aoga i le Year 12&13, e faamalosia ai le luitau o le tau fuafuaina o soo se ituaiga pisinisi. E ta‘i tausaga ma faatamoe ae galulue lava i ai fanau a o feagai pea ma a latou aoga, e talatalanoa i le latou vaega faakamupani ma sailia foi e latou se igoa e faaigoa ai. Na latou mauaina le ipu o le siamupini, $2000 afe, faatasi ma le $3000 afe mo le aoga auā le faasoasoaina mo nisi o taumafaiga faapisinisi a le fanau i le lumanai. O tama aoga uma nei ua latou maua sikolasipi e aooga ai i le Iunivesite i Aukilani (AUT).
O le taumafaiga a nei alii aoga ua aofia ai alo Samoa e toalua, faapea nai alii Tonga, o nisi e iai o latou pito faaatumotu Pasefika, sa finauina le gaosia o le fasimoli taele, e ala i le faaaogāina o organic products, lea la na latou otaina mai ai se laau mai Samoa, o nisi o taumafaiga sa aumai i Tonga, ma faapena ona latou tusia ai se business plan, e pei lava o le tau amataina o soo se pisinisi. E maeu foi le taleni ma le tomai ua oo i ai nai alo Pasefika, ma o se matatia fou lea i totonu o Kalaiesetete, o le uluai aoga foi lea ua mauaina le faailoga tāua.
Avea foi nai nei alo Pasefika ma faataitaiga lelei (role models) i isi fanau aoga o taumafai mai. O le igoa la na faaigoaina ai le latou pisinisi lea ua siamupini nei ia Niu Sila atoa o le “Oceanic Fusion”, lea ua gaosi ai le fasimoli taele mo alii, sasala manaia le manogi ma e momosi ai foi le tino, ua faalauiloa mai foi o le isi a latou oloa gaosi o le a sosoo ai o le kulimi (cream) faamomosi ai le tino pea uma ona faamalu, e gaosi mai lava i laau ma natura o le siosiomaga.
O se tasi foi o tamafanau aoga mai lo tatou atunuu, Mathew Elia, o le alo o Fata Etuale ma Asovale mai Kalaiesetete lea ua faamanuiaina ina ua filifilia i le au lakapi faavaomalo a Niu Sila (NZ Under 17). E avatu ai le faamalo a le tatou nusipepa o le Samoa Times mo le taumafai o alo o le atunuu i soo se agavaa, e lē gata i le finauina o le poto salalau ae faapea foi ma taaloga.
