O le alii talavou Samoa ua 15 tausaga le matua, o Joshua Faletutulu mai Ueligitone, ua manumalo i lenei tausaga i se tauvaga sa faasolo i taulaga faatau uma a le Westfield i aai eseese o Niu Sila, lea e ta‘ua o le Westfield 5 Minutes of Fame. Na matuā maofa le aumaimoa i le toe usuina e Joshua o se pese ua lauiloa i lenei foi vaitau, le Bruno Mars’ The Lazy Song. E toaiva i latou mai Westfield eseese na faia i ai le filifiliga faaiu lea sa aofia ai ma Joshua, ma e 12 palota na manumalo ai Joshua mai lē na sosoo atu ia te ia.
E lei faigofie le tausinioga ona sa matuā mataina foi le faatinoga o taleni a isi o le fanau talavou, i pese ma siva, ae ina ua mae‘a le lua vaiaso (8-21 Aukuso) sa faagasolo ai palota, na iu ane ai loa i le tulaga muamua o le alii o Joshua Faletutulu. E $500 le faailoga tupe mo le tulaga muamua, ma e tatau ona foai lena seleni mo se aoga, lea na faimeaalofa atu ai Joshua i lana aoga Aso Sa, ma le isi faailoga tupe e $1,500 e tatau ona totogi ai le faaauilumaina atili o le a‘oa‘oina o se taleni musika.
Ta‘ua i le pepa o faamatala na auina mai ai lenei lipoti, o le tausaga muamua lenei ua tatala ai i tua le palotaina o tulaga o lenei tauvaga i le lautele o le atunuu, e ala lea i le mafai ona maimoaina i luga o le initaneti, taleni a i latou e toaiva na faia i ai le filifiliga faaiu, ma fai mai ai palota i le website a le Westfield.
O Joshua o se alii talavou Samoa na fanau i Niu Sila, ma e tupuga mai se aiga lotu ma talenia i le musika, e pei ona iai foi isi ona uso ma tuafāfine e fiafia foi e ta le kitara ma pepese, ma e talenia foi o latou mātua i le pepese.
O lona tina lava na faauluina lona alo i lenei tauvaga, e pei ona ia ta‘ua, o le amio lea a si ona tina, e muamua faaulu lona igoa i se tauvaga, ona faato‘ā ta‘u atu lea ia te ia e sauni e tauvaga. Lea la ua iu ai lava ina faamanuiaina i lenei tausinioga.
Faaalia le agaga talisapaia e le tamaitai pule o le itu tau maketiina o le Westfield a Niu Sila (National Marketing Manager for Westfield New Zealand) o Debra Brooks, ia i latou uma na loto tetele e tauva i lenei tausinioga, ma e matauina le mataina o taleni a nisi o le fanau sa faaalia i lenei tausaga.
O le Westfield 5 Minutes of Fame, o se tauvaga e faatautaia e Taulaga Faatau a le Westfield i Niu Sila atoa, i taimi o tuuaga o aoga a le fanau ia Iulai i tausaga taitasi.
E momoli le faafetai a le alii o Joshua Faletutulu, ia i latou uma sa palota ma lagolagoina lana taleni, aemaise lava i ana uo ma lona aiga.
Ua iai le faamoemoe o Joshua, o le a faaaogā le seleni o lona manumalo e totogi ai ana lesona e a‘oa‘o ai le iliina o le pu (saxophone), o se tasi o meafaaili na tau amata ona ia faataitaia i le tausaga talu ai 2010, ae o lea ua fia manao e toe faamasani atili i ai.
O Joshua e aoga i le Kolisi o Tawa i Ueligitone, ma o loo faamoeome e fia faamae‘a le sailia o lona tikeri i mataupu tau musika i le Iunivesite o Vitoria.
