O le manumalo o le alii o Joseph Parker i le la fusuaga ma le alii Tonga o Junior Fa i le faaiuga o le vaiaso, o se faailo manino lea o le lelei ma le lava tapena o le alo o le atunuu, mo le sauni atu mo taaloga a malo o le Taupulega ua fuafuaina ia Oketopa o le tausaga nei.
E ui ina o loo taalo Joseph mo Niu Sila, peitai o loo matamata tetele ai pea le igoa o Samoa, e pei lava foi o le tulaga sa amata mai ai le susuga ia David Tua, i tausaga e tele ua mavae.
O le faatolu ai lea ona feiloai Joseph ma Junior e pei ona faamaonia mai e le susuga ia Rudy Laulunofovaleane Fruean Baice o loo avea ma faatonu pule o Joseph.
O le taaloga muamua sa manumalo ai le alii Tonga, o le feiloaiga lona lua sa manumalo ai Joseph, a o lona tolu sa toe feiloai ai, ae sa lē mafai ona faataunuuina lea faamoemoe i le amataga o le tausaga nei, ona ua lē fia taalo Junior Fa.
O le po la o le Aso Toonai na tea nei, sa toe feiloai ai le toalua lea, ma o le tala fiafia, sa mafai ona faataunuuina le taaloga, ma manumalo ai loa le alo o Samoa Joseph Parker.
Sa iai lava foi popolega ma masalosaloga o le pulega a Joseph, ne‘i toe faamaamulu le alii Tonga, ona lē faataunuuina foi lea o le faamoemoe, peitai sa lē toe solomuli Junior, ae mulimuli ane faasolomuli loa e Joseph i le la taaloga, ma manumalo ai loa i ‘ai e 23 na sili ai ana sikoa i faamaumauga a alii faamasino.
O Junior Fa, ua sauni atu e fai ma sui o le malo o Tonga i taaloga i New Delhi, mo taaloga a malo o le taupulega, a o Joseph Parker e pei ona avatu i le tatou lomiga muamua, o le a fai ma sui o Niu Sila mo 2010.
O loo matuā tulimataia e le toatele taaloga a le alo o le atunuu, ona o loo tele se faamoemoe ua atagia mai mo le lumanai, i le faatinoina o le taaloga.
Joseph David Parker
Aso Fanau: Ianuari 9, 1992
Tamā: Dempsey Lalogafau Scout Parker
Tina: Sala Baice Fruean Parker
Afioaga i Samoa: Solosolo, Saanapu, Motootua, Tapatapao, Faleula, Satitoa, Lotopa
Afioaga i Niu Sila: Papaptoeote i Aukilani i Saute
Vaega tāua sa ia ausia a o feagai ma a‘oa‘oga
Cup Cultural, Leadership Certificate, Sportsman of the year 2009, Scholarship Unitech, Award of Art 2008, Volleyball award, First-fifteen player of the year 2008, Auckland team player representative.
O le 11 tausaga o le matua o Joseph sa amata ai ona fiafia ma agai lona mafaufau i le taaloga o faipelega poo fusuaga mai le tausaga e 2007.
O lana taaloga muamua i le maualuga e pei ona iai nei, o le tausaga e 2007. Ua 19 nei ana taaloga talu ona amata mai lona taumafai i lea foi faagatama.
O lona tamā o se tagata o loo tauaveina se igoa ta‘uta‘ua i le taaloga lava o faipelega, ma sa iai foi lona agavaa i le taaloga i tausaga ua mavae, o le isi lea mafuaaga o le mulimulitai o Joseph i ona tulaga aao.
E lē gata i lea ae sa ta‘ua foi, o le tamā o lona tamā faatasi ai ma le tuagane o lona tina, o isi ia o faataitaiga sa tulimatai ma taulai i ai le vaai a le atalii seia oo mai i lona taimi ua iai nei.
Taaloga i Niu Sila ma taaloga faavaomalo sa auai
O se alii Samoa muamua, a o se sui muamua foi lea ua iloa ma ua ta‘uta‘ua, atoa ai ma le siitia o le igoa o le kalapu i Papatoetoe e pei ona taalo ma tauaveina i ana taaloga. Sa manumalo i le la taaloga ma se tasi o alii siamupini o Ausetalia, i le aupaga o le super heavy weight ia Aperila o le tausaga talu ai.
Sa auai i taaloga a tupulaga o le lalolagi, (World Youth Games) sa faia i Rusia ia Me o le tausaga nei lava. Sa manumalo foi i le pine siliva i taaloga a malo o le taupulega sa faia i Initia ia Mati o le tausaga nei, ma ua toe filifilia ai e tauavea le fu‘a a Niu Sila i taaloga o faipelega i le super heavy weight, lea o le a toe faia i New Delhi ia Oketopa 2010.
O le masina o Aokuso o le tausaga nei lava a o lumanai ai taaloga faavaomalo o le taupulega, o le a toe malaga ai mo Sigapoa i taaloga a le Youth World Olympics o le a faia ai.
Taaloga faalotoifale i Niu Sila
E valu taaloga sa taalo ai mo le Golden Club i le itu i Matu o Aukilani, o le valu foi lea o manumalo sa ia mauaina i le amataga o lona faamoemoe.
E aofia ai ma le la taaloga sa faia ma le alii Tonga o Junior Fa, i sailiga seleni sa faia mo le galulolo i Samoa i le tausaga ua tuanai. E pei ona faamaonia mai e le alii faiaoga, Grant Alkell o le tulai mai o Joseph, o se taimi muamua lea ua siitia ai ma le igoa o le kalapu talu ona amata mai.
Sponsorship
Ua sii ane nei le lima ma tuu ane le tau‘au o le kamupani tele fai sukalati a le Cadbury, e fesoasoani ma lagolagoina le faamoemoe o le alii o Joseph mo taaloga o loo sauni atu i ai i le faaiuga o le tausaga.
O le faatauina o le sukalati o loo iai le igoa o lea kamupani, o le fesoasoani atu foi lea mo le faamoemoe o Joseph Parker, i le itu tau seleni.
O le polokalame a le televise tasi a Niu Sila i le masina na tea nei, sa faatalanoa ai Joseph ina ua piki e le asosi a Niu Sila, ma filifilia ai mo taaloga a malo o le taupulega.
O lona aiga i ona mātua Dempsey ma Sala Parker, faapea lona uncle le tuagane o lona tina le susuga ia Rudy Laulunofovaleane Baice Fruean, o loo fesoasoani malosi mo le tulaga tau seleni mo le faataunuuina o fuafuaga a le alii fusu.
