Ua na o le tasoo o faafetai a le tina o Ruta Toafa o Ululoloa ina ua faateia i le vili atu o le kamupani o le Sai Motors o ia ua manumalo lana pepa na faatau i le se‘i o le lulu a le kamupani.
O se taavale laitiiti e toafā le pasese ua manumalo ai le tina, ma o lana faamatalaga ua maua le taavale o le a alu ai i lana galuega ma momoli ai si ana fanau i le aoga.
“E mamao tele le mea o loo o‘u faiaoga ai o Aleisa, ae faafetai i le Atua i le faamanuiaga ua maua ai se fesoasoani tele isi o‘u aiga”.
“O le faato‘ā maua lava lea o se taavale e si o‘u aiga”. E faamatala le tina o Ruta, a o molimau le toatele na auai i le se‘iga o le lulu a le Sai Motors i le vaiaso na tea nei.
E tolu taavale o loo faia i ai le lulu a le kamupani, ma o le taavale muamua ua manumalo ai Ruta, ae o le taavale lona lua ua manumalo ai le tamaitai o Juliana Roebeck o Vaiusu-uta. O le vaiaso nei o le se‘i mulimuli a lea kamupani faatau taavale i Samoa.
“E na o le tasi lava la‘u pepa na faatau, ae ua ou te‘i o loo fai se fonotaga sa ou auai ae vili atu le kamupani o a‘u ua manumalo”.
O le Sai Motors o se kamupani o loo faatauina atu taavale sa faaaogā muamua poo used cars o loo latou aumaia mai Iapani.
Faaalia e le pulega o le kamupani e na o le $10 tala le tau o le pepa, ae a manumalo ai i se taavale e sili atu lea i lo le tau saili i se nonogatupe e alu le fia tausaga o tau togitogi. Peitai o le laki lava e fai ai mea nei o lulu, aemaise e na o le tasi lava le faailoga.
Sa tuai ona taunuu ane nisi o pepa lulu i le aso na se‘i ai le lulu muamua ma sa fautuaina ai e leoleo e faatalitali se‘i taunuu uma ane tusi lulu o le se‘i muamua, e ui sa iai nisi leo sa fautuaina e se‘i loa tusa lava pe tuai ane tusi lulu.
O se solitulafono i lalo o aiaiga o le tulafono tau taaloga faitupe le faia o ni gaioiga faaalatua e atagia ai ni faiga lē amiotonu i le faatinoga o se taaloga fai tupe faapei o se lulu.
O nisi o le ekalesia EFKS mai Faatoia o loo fesoasoani i le kamupani o le Sai Motors mo le faatauina o pepa lulu. O se tasi foi lea o ekalesia o loo latou faatauina taavale mai le kamupani ma faia ai a latou lulu saili tupe.
O le kamupani faatau taavale o le Singapore Motors na latou uluai faafoe lulu o le faailoga o le taavale, ae e lē o toe iai ni lulu a lea kamupani faatau taavale o toe faia i le taimi nei.
