O faaosoosoga o ni faafitauli e feagai pea ma tagata uma. Sa amata mai ia Atamu e oo mai i le taimi nei, o loo fetaiai pea ma tatou. O le upu tofotofoga ma le upu faaosoosoga e iai taimi e feaveai ai, ona e tutusa lo la uiga i le gagana Eleni (peirasmos).
Ae o lona eseesega tele, o tofotofoga e mai le Atua mo le tuputupu faaleagaga o le tagata, ae o le faaosoosoga, o ala o le tiapolo e maileia ai le tagata ia agasala.
E tele taui o le manumalo i tofotofoga ua folafola mai e le Tusi Paia. Muamua, o le faaamuia a le Atua. O le upu amuia, o lona uiga o le fiafia (blessed). O le fiafia ina ua mautinoa e leai se mea e faalavelaveina ai le soifua usiusitai i le Atua.
E saoloto ma le faamoemoe i le pale o le ola ua folafola mai. E leai se popole, poo ā lava tofotofoga ma faaosoosoga, ua iai le pulunaunau i le Atua e filifili ai le amiotonu, ona ua mautinoa lona manuia.
Ae faapefea la ona tatou manumalo mai tofotofoga ma faaosoosoga? Afai e iai le taui ma le pale o le ola, o le ā le mea ua toatele ai i tatou ua faavaatuia ma lē taulau faamoemoega lelei, ona ua toilalo pea i faaosoosoga? O nai fesoasoani mo tatou, ina ia mafai ona manumalo mai faaosoosoga.
• E faaosoosoina tagata uma
Ia manutinoa, e faaosoosoina i tatou uma. E lē popole le tiapolo poo ā ni o tatou tulaga tofi, e sau lava ina ia tatou malaia. Pe e te faaleagaga pe leai foi, e lē ‘alo lava faaosoosoga ma tatou. O le tele foi o lo tatou toaaga i lotu, o le mafanafana foi lea o le pipii mai o le fili.Tusa lava po ua e tagata matua, e faaosoosoina lava oe. Pe e te faifeau, tiakono, a‘oa‘o, poo le ā lava le ituaiga tagata e iai oe, e te fetaiai lava ma faaosoosoga. O le pepelo pe a faapea, e lei faaosoosoina lava oe e le tiapolo.O loo manino i le Tusi Paia, e lē se agasala le faaosoosoga, ae o lo tatou gauai i le faaosoosoga ma fai ai le agasala – o lo tatou sese lea. Silasila foi ia Iesu, sa faaosoosoina foi, ae lei agasala ai. (Eperu 4:15) “… a ua faaosoosoina o ia i mea uma e pei o tatou, a ua leai se agasala ia te ia…”
Ua tatou iloa nei la, o le pepelo ma le fai ma alofaga lo tatou faapea, e malosi le faaosoosoga.
Auā o le mau a Paulo i le 1 Korinito 10:13, “Ua le maua outou e se tofotofoga e ese i lo tagata…” O le uiga, e tofotofoina tagata uma lava i tofotofoga masani, ae o le manumalo o loo i le tagata lava ia tusa ma lona faatuatua i le Atua.
• O lau matāfaioi le tetee o faaosoosoga
Ia aua ne‘i e taumafai e tuuaia se isi pe a faaosoosoina oe. Ona o le natura lava faaletagata, e taumafai e tuuai i se isi pe a sese pe agasala foi. Fuaiupu 13, “A faaosoosoina se tasi, aua le faapea, Ua faaosoosoina a‘u mai le Atua; aua e lē mafai ona faaosoosoina o le Atua i mea leaga, e lē faaosooso atu foi i se tasi.”
E lē faaosoosoina e le Atua se tagata, peitai tatou te fiafia tele e tuuaia isi. Tatou te tuuaia le malo, o kamupani. Tatou te tuuaia o tatou tuaoi poo uo, e oo lava i le Atua.
E iai nisi o taimi a tatou matuā lopala lava i le agasala, tatou te faapea ane, ia ai lava o le finagalo lea o le Atua. Ae leai, o filifiliga lava a le tagata ia. Ua fia nisi ua fai o latou lava manao, ae faapea, o le mea ua fai mai ai le Atua?
O le tele o taimi, e matuā feteenai mea e fai e tagata ma mea o loo fai mai ai le Tusi Paia, ona tatou taumafai lea e toso mai le Atua e tau faamaonia ai o tatou lava manao.
O loo apoapoai mai le Tusi Paia, aua e te ta‘u fua le suafa o le Alii lou Atua. Ae Talofa, ua o se meanoa i le toatele le faatasina solo o le suafa paia o le Atua.
O le natura tautuuai lava lea sa i le amataga. E fesili atu le Atua ia Atamu pe aisea ua ‘ai ai le laau faasāina, ae tuuai i le fafine na ia aumai. E fesili atu i le fafine ae tuuai i le gata.
Ia silafia lelei, o le tele o faafitauli e tutupu i o tatou olaga, e mafua mai ia tatou filifiliga e fai. Afai tatou te fia manumalo i faaosoosoga, ia filifili ma le toto‘a ma le mautinoa, o le finagalo lea o le Atua, ae lē o o tatou lava manatu poo ni manaoga.
• Ia sauniuni
Ia sauni ma le iloa lelei, e oo mai faaosoosoga. O le apoapoaiga a Iesu, ia mataala ma tatalo ne‘i oo mai faaosoosoga. O la Paulo, ia oofu i ofutau atoatoa. A faafaigofie, ia sauniuni i taimi uma. O le mau a le aposetolo o Iakopo, “A ua taitasi ma faaosoosoina, pe a tosina ma maileia i lona lava tuinanau.” O le upu ‘maileia’ o lona a‘a le upu ‘mailei’. O le mailei o se mea e fafau faafoliga pe faatogafiti ona fai, ae o loo iai i totonu se mea e faaumatia ai le tagata e tosina i le mailei.
O se faataitaiga, o le mata‘u. E fafau e le faifaiva le pa fagota ia matagofie i le vaai, pe ufiufi foi le matau i se maunu. Ona sau lea o le ia, na te leiloa o le maunu lea o loo faalafi ai i totonu le matau na te laveina lona gutu pe a ai.
E faapena le uiga o Satani, na te faatosina tatou i ni mea mananaia i le vaai, ae o tua o loo fafau ai lo tatou malaia. (Faaauau lenei mataupu)