A malaga lo tatou atunuu o aumau ma nonofo i atunuu i fafo i Samoa, e maofa i le tulaga ua vaaia i le tele o suiga ua iai le atunuu. Peitai o le molimau a le ofisa o tagata tafafao e sili ona maofa le au malaga tafafao e lē gata i tulisi a o tagata Samoa lava i le mamā ma le matagofie o nuu ma afioaga.
O le autū lea o le polokalame a le Malo ua faafoe e le pulega o tagata tafafao lea ua faateleina ai le fiafia o nuu ma afioaga o le atunuu e lagolago i ia taumafaiga tāua.
O le mau lea a le alii ofisa sinia o loo nafa ma le tauvaga o le teuteu faaaulelei o aai o nuu ma afioaga i le atunuu, le tofa Fanaea Natu Taule‘alo, o le sui taitaifono foi o le komiti mo le faamamāina o aai. “O le tāua o lenei faamoemoe ona ua matagofie ai aai ma faoaaai o nuu ma afioaga”.
O lona finagalo lea ina ua fesiligia i se tulaga ua taoto mai ai lenei polokalame a le Malo ma le Pulega o Tagata Tafafao auā ua 14 tausaga o faatino pea.
“Ua unaia malosi ai lava isi nuu e auai, auā ua latou silasila atu i le manaia o isi nuu aemaise ua latou maua foi molimau lelei o faamanuiaga e ala i faailoga tupe o loo maua e nuu ma afioaga o loo mau tulaga i le tauvaga i tausaga taitasi”.
O le atina‘e o tagata tafafao o le ivitu lea o le tamaoaiga o Samoa, ma o le faamuamua foi lea o loo ave e le Malo i le atiina‘eina o turisi. Ua faamauina o lea atiina‘e o loo lona lua i auaunaga o loo maua ai seleni mo le tamaoaiga o le atunuu.
Talu mai le tausaga e 2007 ua oo atu i le $30 miliona se vaegatupe ua sasaa e le Malo e faaleleia ai le atina‘e i ona vaega eseese, aemaise lava o le siitia o le auaunaga tau faletalimalo.
O le $10 miliona ua faaagaga mo gaioiga faatosina ua faatatauina ai le silia i le 2 ma le ‘afa miliona mo faasalalauga faatosina i totonu o Ausetalia.
“O le autū lea o lenei tauvaga ia malaga tafafao mai turisi ma agai i nuu ma afioaga o Samoa ona latou molimauina lea o le mamā ma le matagofie”, na saunoa ai Fanaea.
O le tauvaga o le tausaga na tea nei na faato‘ā lau togi i le Aso Lulu, aso 30 o Mati 2011.
O Savaia i Lefaga na tulaga muamua i le tausaga talu ai, ae o lea ua sola nei ma Falelatai le faailoga muamua mo le vaega o nuu tetele e $6,000 le faailoga tupe. Ua tulaga lua Savaia i lenei tausaga e $5,000 le faailoga tupe.
Tulaga tolu o Lalomalava e $4,000, tulaga fa Satuiatua e $3,000, lona lima ai Matautu Falealili e $2,500, lona ono Siufaga i Savaii e $1,500, tulaga fitu Faleatiu e $1,500 foi, ma Faleapuna i le tulaga valu, lona iva Magiagi, ae tulaga sefulu Tuanai na maua foi le faailoga tupe e ta‘i $1,500.
O Vaisa‘ulu i Savaii ua tulaga muamua i le tauvaga mo nuu laiti ua maua le siakitupe e $4,000 tala. Tulaga lua Faleaseela-uta e $3,500, Saletele i Fagaloa i le tulaga tolu e $3,000, tulaga fā Safua e $2,500, Sapigi/Luua i le tulaga lima e $1,500, ae o isi afioaga e pei o Papa Puleia, Manase, Salua Manono-tai, Puleia, ma Lepuai Manono-tai na maua faailoga tupe e ta‘i $1,000 tala.
O Savaia Lefaga na manumalo i le faailoga a le Western Union ae o le Kolisi Faafaifeau i Malua, le ekalesia Metotisi i Faleula, ma le Kolisi Faafaifeau a le Metotisi i Piula na ave i ai faailoga faapitoa.
O le tauvaga o le tausaga nei ua iai se suiga, lea o le a tauva ai ai nuu mai le malaevaalele i Faleolo agai mai i Apia i le faamamāina o aai. Faaalia e Fanaea Natu o le pulega o tagata tafafao, e fou le vaega lea o le tauvaga ona o le fia unaia o nuu o loo i lea vaega o le motu o Upolu e faamamā o latou aai auā tasi lea vaaiga tāua i tagata e malaga tafafao mai i Samoa.
