Na matuā faatumulia le Convention Centre i le Sky City i Aukilani i le sauniga faapitoa faaletausaga o le Safeguard Awards e faasilasila aloaia ai falefaigaluega ma tagata faigaluega ua manumalo i faailoga faapitoa e 10.
O lenei faamoemoe sa avea ai le susuga ia John Campbell o le Campbell Live ma fofoga o le po. O le po lea o le Aso Lua, 15 Iuni 2010, sa matuā toatele ai le aufaipisinisi iloga ma pule o kamupani tetele i totonu o Niu Sila sa iai, ma e tusa ma le 500 tagata sa auai i lea faamoemoe.
E pei ona faaalia o le susuga ia Ed Fili mai le kamupani pailate o le CHEP Pallets, sa faaulu lona suafa e le latou falefaigaluega e tauva mo le faailoga o le Most Influential Employee, poo le tagata e pito i sili ona amanaia lana galue. O se tasi lea o faailoga tāua o lea po ma e sili atu ma le 50 tagata faigaluega sa faaulu suafa mo lea faailoga.
E oo mai i le po o le Aso Lua 15 Iuni toe toatolu tagata o loo totoe ai i lea avanoa. I le maitau atu i tagata ma falefaigaluega sa aulia le laasaga mulimuli lea o le tauvaga (finalists) o i latou nei ma kamupani ua matuā maoae lo latou sao i le atinaeina o Niu Sila.
Na taualuga lea po i le faasilasilaina aloaia o le tagata ua manumalo i le vaega lea o loo tausinio ai lenei alo o Samoa. Na faaalia e se tasi sa molimauina lea po, na matuā pati ma laulaututu (standing ovation) le mamalu sa auai ina ua faasilasila mai o le susuga ia Ed Fili ua manumalo i le faailoga o le Most Influential Employee.
O le isi mea sa maitauina na o Ed Fili le sui o Samoa ma le Pasefika atoa sa auai i lenei taufetuliga. Faaalia e Ed Fili lona agaga maualalo ma le faafetai i le Atua ona o lenei faailoga faapitoa. Na ia ta‘ua foi o le faamaoni lava ma faailoa i le pulega auala e faatupulaia ai le saogalemu o le avea foi lea o oe ma tagata faigaluega mataalia.
O le susuga ia Ed Fili e mai le afioaga o Falefa ma Tuanai. O lona tamā o Fauafa Tuivaiave a o lona tina o Sikotilani. Ua maliliu uma i laua. O loo faaipoipo le susuga Ed Fili ia Savelu Mulipola ma ua toalima o la alo.
E avatu faamanuiaga a le tatou nusipepa i lenei toa o le atunuu. Malo le filigā ma le tautua faamaoni, aemaise le faaeaea i le igoa o si o tatou atunuu o Samoa.
