Manumalo Bluesky Manuiti Samoa i le Otahuhu Rugby Club

Na taufai saili solo e le toatele o tagata Samoa i Niu Sila le nofoaga o loo faamautu ai le Bluesky Manuiti, ina ua logotala i lona taunuu mai i Niu Sila i faasalalauga a le Radio Samoa 1593am aemaise le polokalame o tala i taaloga.

Na faato‘ā feiloai le tatou polokalame ma le aumalaga mai Samoa i le aoauli o le Aso Gafua na se‘i mavae atu, i alo taaalo faapea ai foi le Malaga mamalu, o se atinae tau taaloga ua ave nei i ai le faamuamua a le malo o Samoa i lona faamautuina.

O le toatele o sui o le Malaga o loo filifilia mai lava i totonu o aoaoga tulagalua faatasi ai ma le filifilia o Faiaoga o le au ma le komiti o le Malaga.

Ua mae‘a nei la le uluai taaloga e ui ina malolo ai le Bluesky Manuiti ia East Tamaki Rugby Club U-12 sosoo ai ma le faaafe masani a le kalapu a East Tamaki i lea po. Sa  lelei atoatoa tulaga i le taaloga ma leai se tama taaalo na faamanu‘alia i lea afiafi.

O le afiafi lava lea na faalauiloa ai ni avanoa sikolasipi se lua, ma o le Aso Toonai la na se‘i mavae atu nei na toe maimoa ai i le Bluesky Manuiti i le la taaloga ma le U-12 a Otahuhu Rugby Club i Aorere Park.

Pe tusa o le 12 i le aoauli, na vaaia le lolofi atu o mātua, aiga, ma paaga i lea taaloga. Na mae‘a lea taaloga ina ua manumalo le Bluesky Manuiti ia Otahuhu ma faaauau ai se maimoaga a le au masii mai Samoa i Eden Park e tapuaia le taaloga a Aukilani ma Waikato i le aoauli o le Aso Toonai pe tusa o le ‘afa o le lua i lea afiafi.

O loo faagasolo pea taaloga a le Bluesky Manuiti i lenei vaiaso i le la taaloga ma Waitemata Rugby Club i le Aso Lulu, 12 o Setema, ae faaiu ai i le la taaloga ma le U-12 a le Auckland Samoa Rugby Club i le Aso Toonai, ma taualuga ai le malaga taamilo mai i Niu Sila nei.

Tatou nono manū pea ia i le Atua ina ia iu ma le manuia le faamoemoe e pei ona tuua ai Samoa ae malaga mai i Niu Sila nei.