O le aufaipese a tamaitai talavou lalelei mai le laumua i Ueligitone, ua latou faaeaea ia Niu Sila atoa, ina ua manumalo mai Texas i Amerika i se tauvaga pese, le Rising Star Contest, e pei ona sa faia i Houston, i Texas i Amerika, o se vaega o se fonotaga faavaomalo e ta’ua o le Sweet Adelines.
O se tauvaga faavaomalo, ma e toatele aufaipese mataina mai le tele o atunuu eseese o le lalolagi na auai atu i ai, peitai ua sola mai ma le manumalo i le vaega o tamaitai (female barbershop quartets) e 25 tausaga pe i lalo ifo, le aufaipese a tamaitai aoga Niu Sila. Peitai o se tala silisili mo Samoa, auā o i latou uma o alo tamaitai o Samoa, o loo aotauina i le Kolisi o Aotea.
O tamaitai o le aufaipese, o Olivia Samuel 18 tausaga, ae o Knoxana Leasi, Georgina Peniamina, ma Theodora Esera, e ta’i 17 uma tausaga. O le tolu tausaga talu ai, sa sosoo ai pea ona manumalo lenei lava aufaipese i tauvaga pese faapea (barbershop contest) a aoga maualuluga i totonu o Niu Sila.
