E sefulu moliaga o le faaoolima matagā na molia ai Mulitalo Siafausa, na faamaonia e le faamasinoga, ae lē faamaonia isi moliaga e sefulu o le faia o ni uiga lē talafeagai i se tamaitai sa faafaigaluega e Mulitalo i lona aiga i Vaimoso-uta.
Na lauina le faasalaga ma poloaina ai lea tamalii na te faia ni galuega mo ni itula auā le lelei o tagata lautele poo le Community Service.
O le isi vaega o lona faasalaga o lona totogi lea o se tinoitupe e toluafe tala i le tamaitai na aafia i lana gaioiga solitulafono.
O loo matuā tapu ma faasā e le faamasinoga ona faailoa le suafa ma le nuu o le tamaitai. E lua foi tausaga ua nofo vaavaaia ai Mulitalo ma ia amio lelei ma tausisia aiaiga o lona faasalaga. O le faaiuga lea na faia e le alii faamasino o Justice Pierre Slicer, ae sa lē talia e loia a le Malo sa finauina le mataupu ma faapea ona faaulu ai se talosaga i le Faamasinoga Apili ina ia toe silasila i le faasalaga ona e lē o fetaui e tusa ma aiaiga o le tulafono.
O le talosaga apili foi lea na toe ave ai le tuualalo a le itu talosaga i le Faamasinoga Apili ina ia toe silasila i le vaega 113 o le Tulafono o soligatulafono mamafa, le Criminal Procedure Act 1972, pe o aiaia ai le faia e le faamasinoga o se faaiuga o taui tupe mo i latou e aafia i ni faiga solitulafono tau feusuaiga (sexual offences victims).
O le vaiaso na tea nei na tauaofia ai galuega a le faamasinoga o talosaga apili mo ana galuega faaiu o lenei tausaga e pei ona faalua ona tauaofia i le tausaga.
O le Aso Faraile na tea nei na aumai ai ana faaiuga i mataupu e fitu mai le aofaiga e valu o talosaga na faaulu.
O le iuga o le apili a loia a le Malo faasaga i le faaiuga a le Faamasinoga Maualuga i moliaga o Mulitalo, ua talia. Ua faatonuina ai e le faamasinoga apili le toe tulai o lē o loo molia mo se faaiuga talafeagai (appropriate sentence).
Ua fai mai foi le Faamasinoga Apili o loo manino le vaega 113 o le tulafono o soligatulafono mamafa, e leai se faaiuga tau taui e faia e le Faamasinoga Maualuga mo se tasi e aafia i ni faiga solitulafono tau feusuaiga.
O le faaulu ai o le talosaga apili a le itu a leoleo e pei ona avea ai loia a le Malo ma sui e finauina moliaga, sa taofia ai le faatinoina o le faaiuga a le Faamasinoga Maualuga mo Mulitalo ona sa tālia le Faamasinoga Apili ma sana iuga, lea ua mae‘a ona fofogaina i le Aso Faraile ua mavae.
