E faafiafiaina lava le agaga ona ua mafai e se tasi o le fanau ona ausia foi lenei faamoemoe tāua.
E talitonu le mafaufau o se avanoa tāua tele lea e mafai ona faalautele ai le malamalama o le alii o Antony i le faaaogāina o lea foi taleni ua tuuina i ai e le Atua, auā foi lona lumanai ia aemaise ia tautua ai i le atunuu e ala i le kuka.
O le alii lenei o ana mea masani lava ia e fai i le fale, na amata mai lava i le falaiina o le panikeke ona faasolo mai ai lea i le faiga o le puligi.
E fiafia tele Antony e faifai mea faatasi ma lona tina i totonu o le fale aemaise le taimi e fai ai le kuka.
O le lagolagosua malosi a si ona tina o Paletina Su‘a i ana kuka e fai, ua faaosofia ai le fiafia o le alii o Antony e faatino lana taleni.
E tusa ma le $500 le tau aofai o mea e faaaogāina i kuka (baking equipments) na maua i le faailoga muamua mo ia, ae $1000 le tau o mea e faaaogāina e lana aoga, o se faamatalaga lea na tuuina mai e le tuaa o le alii o Anthony, le tamā ia Leae‘a Saumani Su‘a.
Ia faamanuia pea le Atua i le taleni a si atalii ma ia faaaogāina mo lona lumanai.
