Teuteronome 28:44 “E te no mea ia te ia, ae le no mea o ia ia te oe.”
Teuteronome 28, e matilatila ai manuia ma malaia. Manuia o ē anaana, ma malaia o ē lē anaana. Fetalaiga tuusao a le Atua ia Mose mo Isaraelu, e limataitaiina ai lo latou soifua, aemaise le faamamaluina o feagaiga ma latou.
O faamanuiaga mo le nuu filifilia, ae a o ese ai, e malaia. O afioga foi mo tatou le aukerisiano.
Ua afio mai Iesu, aumai le Agaga Paia, faatumauina ma lana Upu e taitaiina tatou ma faamatalaina manuia ma malaia. Ua momoli mai e le Upu luitau ma taiala, apoapoaiga ma lapataiga mo le tagata.
O le amiotonu a le Atua, ua faailoa mai ai manuia ma le malaia, ola ma le oti, le lagi ma seoli.
Ua lē natia se mea e tasi e manuia ai tatou, ua aumai foi lapataiga. Ua tuu le loto faitalia ia i tatou e fai ai filifiliga saoloto, ae lē faasaolotoina tatou mai le iuga o a tatou filifiliga, manuia poo malaia. Lona uiga e tatau i le tagata ona faalogo ma usitai. O le lē usitai, o le tetee lea i le Atua, o lona taunuuga o malaia, ae o le usitai, e taunuu i manuia.
E ao na filifili toto‘a, faautauta ma ia poto le faatatau, auā e manao Satani ia e lē usiusitai, auā o ia o le faamatua o tetee i le Atua.
A lē usitai, o nisi nei o mea e oo mai. E malaia le fanua e nonofo ai. E malaia totonu o lou fale ma lau fanau. E malaia au mea totō ma au lafumanu, soo se mea e te alu i ai, e malaia. E faapipii atu foi e Ieova faama‘i ia te oe, e tuliloa ia te oe seia faaumatia lou ola.
“E avea foi lou lagi o i ou luga ma apa memea, ma le lalolagi o i ou lalo e fai lea ma uamea.” Lona uiga, leai se timu, leai se sau mālū e faasūsūina laufanua, ona liua lea o le mea e tu ai ou vae e fai ma eleele o le faatafunaga. E lē ola ai se laau, ua matutu ma mago. Soo se atina‘e e te manatu e fai, e malaia.
A sii se taua, e te alu atu i le ala e tasi ia manumalo, ae e te sola i ala e fitu.” E matuā faalumaina oe. E apa Kaliu, pepe lou ie ma pula lau ato. Auā e tuuina atu oe e Ieova ia fasia e ou fili.
E osofaia lau ulugalii e faaosoosoga e tele, e leai se manuia e fanau mai ia te oe. E te tigaina e faigaluega e totogi sou fale, ae sau le isi fai ma ia. A fai sau tovine, e te lē inu i lona sua.
E avea au povi, asini ma mamoe e ou fili. O lau fanau e avea faatagataotauaina, e tinovavale ma paeee, ae lē mafai ona e laveaia i latou. E pei oe se manu e lele ae valovaloia. A fai sau faatoaga, e aina ona fua e sē akerise, o se tovine e aina e anufe.
O au olive e malili ma pepetuia ona fua, e lē maua ai sau fagu suauu. E te tausi lau fanau, ae manuia ai le tagata ese. O le tagata ese e sili lona manuia nai lo oe, auā o le a faamaualaloina lava oe.
E te no mea i le tagata ese, ae lē no mea o ia ia te oe. E faateteleina lou mativa. E ola aitalafu, e lē mafai foi na totoma atu nisi ia te oe.
E ui o oe o le tagata filifilia, ae ona o le lē anaana, e suia ai lou maumea i lou mativa. E aveesea lou tamaoaiga, ae nofo aitalafau i tagata ese. Mativa i le taimi, mativa i manatu ma mafaufauga lelei. E faamativaina i le malosi, soo se mea e taumafai e fai, e lē manuia. Ua tetee le Atua i au fuafuaga ma polokalame, ina ua lēe anaana i ana poloaiga.
E fai oe ma iu, ae lē o le ulu. Leai se isi lua te taupule, e te lē taulia, o oe o le siusiu. Fai le Tusi Paia e faia nei mea ma faailoga e faavavau o lou malaia, ina ua lē usiusitai.
Ae afai e usiusitai ma anana i ana poloaiga, fai mai e faasilisiliina oe e Ieova i nuu uma. E amanaia oe e Sasa‘e ma Sisifo. E manuia lau fanau, manuia lou fanua ma lou fale.
E manuia soo se mea e te alu i ai, manuia ma soo se mea e te fai. A alu i uta e manuia, alu i le sami e manuia, alu i Samoa e manuia, nofo i Niu Sila e manuia, sau i Ausetalia e manuia. Auā e faamanuia Ieova ia te oe, e leai se isi na te taofia ou manuia.
E faalelei e Ieova oe ma ou fili, afai foi e siitaua nisi ia te oe, e faata‘ape faapulusalalau i latou e le Atua i ou luma.
Manuia au faatoaga ma au lafumanu, na te faamamaluina oe i luma o tagata, e faateleina ou manuia ma manuia o lau fanau ma fanau o au fanau. E tatala e Ieova lona lagi mo oe, ma faatoto ifo le ua o ona manuia ia te oe.
E te lē no mea, fai oe ma ulu, ae lē se iu. E te aupitoaluga, ae lē laualalo, muamua, ae e te lē mulimuli, e manuia foi mea uma e te fai.
O manuia nei ua folafola mai e le Atua mo le tagata usiusitai. O fea lava o e iai, afai o utia i nisi o nei mea ua laulau atu, o loo iai le avanoa e salamō ai.
O la‘u tatalo: “Ia faamanuia oe e Ieova, ma na tausi ia te oe. Ia faamalamalamaina e Ieova ona fofoga i luga ia te oe, ma alofa atu ia te oe, ia faasaga mai e Ieova ona fofoga ia te oe, ma tuuina atu ia te oe le manuia.” (Numera 6:24-26) Soifua.
