I le sauni atu mo le Kerisimasi na faatumulia le faafiafiaga faaiu o le tausaga a le aufaipese Opela a le pasefika ‘Casula Voices’ na molimauina e sui o le Opera Australia ma sui o le Fono a Liverpool (Council).
O le Aso Toonai talu ai i le itula e fitu na pati ma po ai le aumaimoa i le usuina e lenei aufaipese na tuufaatasi i le masina o Iulai pese opela e pei o le ‘Va Pensiero’ o se pese i le gagana Latina na fatu e faamatala ai lagona pologa ma le salamō o Isaraelu i taimi na faatafea ai i Papelonia.
O le fegauaiga ma le faaleoina o upu Latina na matuā faateia ai le aumaimoa palagi lenei i alo o le Pasefika. O nisi pese na molimanao i ai le Opera Ausetalia e usuina e aofia ai pese faagauloto o le vaitau o le taua i totonu o Amerika i le (Civil War) amata na fausia le malo.
Na molimanao foi i se pese a Michael Jackson na usuina mataina e vaega e fā o le aufaipese. Faapea le Joyful Joyful mai le ata tifaga o Whoopi Goldberg. Na taualuga i le pese matagofie o le Kerisimasi ‘Angel’s Carol.’
E na o le tasi le aso o le vaiaso mai le fitu i le iva (7pm-9pm) na tapena ai lenei aufaipese talu mai Iulai ae na faaalia e le taimipese iloga a le Opera Australia, susuga Simon Kenway le talenia o tagata Pasefika.
Na lagona uma le agaga o le Kerisimasi e le aumaimoa. “E momoli la‘u faafetai i le susuga ia Robert O’Brien ma sui o lenei aufaipese mo le avanoa na matou galulue ai seia oo mai i lenei po.”
“O se fiafiaga tele ia te au le tinou ma le talenia o siufofoga o lenei aufaipese ma ua ou nofo sauni i le tausaga fou mo le isi laasaga. Tau ina ia faasoa atu nei aoaoga i leo mo aulotu ma faalapotopotoga Samoa i Sini nei.”
Na saunoa le faatonu ia Robert O’Brien o le tausaga fou i le masina o Novema o le a pepese ai le Casula Voices i le Opera House i se faaaliga ma nisi aufaipese. Ua talia foi le valaaulia e fai ma aufaipese aloaia a le itumalo a Liverpool (council) i le 2014 ma tua atu.
