Na momoli alofaaga o le Afioga Lavea Jay Lagaaia i tamā uma o si o tatou atunuu i Sini ma Ausetalia nei ma faaopoopo mai ai, e tatau ona tatou faamalolosi ma tauave le faasinomaga o nai o tatou tuaa ma finau mo mea lelei.
E pei ona silafia o le alo lenei o Samoa ua maoae lona tulai mai i ata televise ma tifaga talu ona siitia mai Aukilani i Sini.
I lana faamanuiaga na faaleo i luga o le leitio na faamatala ai e Lavea Jay Lagaaia le pele o lona faasinomaga a o feagai ai ma avanoa matalasi i lana taleni i le Televise, tifaga ma le pese. “O si o‘u tamā e mai le afioaga o Faala Palauli a o si o‘u tina e mai le afioaga o Leulumoega tuai. Na maliu si o‘u tamā i le 1983 faato‘ā sefulu o‘u tausaga ma o le tala a lo matou aiga ma tagata o se tasi e oa i le aganuu ma le fetalai.”
Sa saunoa Jay e ui o lona olaga atoa o Niu Sila ma Ausetalia, ae lē faagaloina ona mātua aiga, nuu ma ona tagata. “E ui lava e le atoatoa la‘u tautala i le tatou gagana ma le faamatai, o lo‘u loto ma le agaga e tauave ma faamalosi i tatou tagata aemaise i lenei atunuu o Ausetalia.”
Ua avea ia ma faataitaiga lelei mo fanau Samoa ma le Pasefuka ina ua atoa le sefulutolu o tausaga o iai i le polokalame Play School a le ABC TV.
“A o lei maliu si o‘u tamā i le 1983 na ou tautino i ai ou te tauaveina lona igoa ma fai mea e tauleleia ai lo matou aiga, ma e ui lava o loo o‘u tautua i luga o le TV Ausetalia ma ata tifaga, ou te talitonu o le faafeagai lea o le tautua nuu a si o‘u tamā i taimi o soifua. E tāua tele ia te au lo‘u sao i lenei atunuu palagi pe a ou iai i ata Televise ma ata tifaga o a‘u o se Samoa.
O le manatu o Lavea Jay Lagaaia e tatau ona suia nisi o masani a nai o tatou fanau auā le lumanai i atunuu nei. “E lē tatau ona toe fai i tatou ma auauna i soo se mea tatou te lē o fiafia i ai”.
O le uiga o lea saunoaga a Lavea ia iai so tatou leo i le soifuaga i nei atunuu o loo tanumia ai se saolotoga ma le fiafia aemaise le alualu i luma o le soifuaga.
“E tatau ona fesili ma sailiili i tulaga o loo nenefu ai ae aua le vave ita ma toatamai.” O se faataitaiga o lea mau a Lavea “O le tulaga masani i nai o tatou tagata afai e aumai lau sui e lē atoa, o le upu muamua lava a le Samoa, o le ita ma fesili pe taufaavalea ma toatamai i le faatauoloa.” Ae peitai na ia faaalia, “e tatau ona toe faamanatu e $10 le tupe na avatu ma iloa ai e le faatauoloa ….ona e iai taimi e galo ai…e le pine le toe faasa‘o mai o lau sui.”
O lenei faasoa a le alo o Samoa ua atagia ai auala o lona ausia o pine maualuluga i le galuega fai ata tifaga ua ausia. Ina ua fesiligia i ata tifaga, na faaalia e Lavea o le Star Wars, Attack of the Clones le ata pito sili ona faamalieina ai lana auaunaga. “Sa leai ma so‘u iloa e avea a‘u ma fetu o le Star Wars! Ou te manatua lava le 1977 i Aukilani na ou matamata ai i le Star Wars muamua ma maofa i le mataina ae peitai o le 2000 na ou galue ai i le Star Wars ma le isi tamalii Samoa ia Natahniel Lees.”
E manatu Jay e toatele nisi tama ma teine Samoa i Ausetalia o iai le taleni e ao ona faalauiloa ma tuliloaina. O Lavea le tagata muamua na faateia le pulega a le Home and Away ina ua lau e Lagaaia le faailogalanu.
Sa maua foi se avanoa e maimoa ai Samoa i Melepone ina ua auai atu Lagaaia i le faaiuga o le Vaiaso e tauaao Faailoga o ‘Tama iloga i Vitoria’. O le vaitaimi o le Kirisimasi lea e fuafua e faatau ai ana CD ma DVD o pesepesega o le Kerisimasi ma le CD/DVD o pese a le fanau e taina i le ukulele.
