Ua mautinoa nei, o le a talimalo Samoa i le taaloga faaiu mo le Pacific Tour a le aulakapi a Sikotilani, lea o le a faia i le aso 23 o Iuni i le Apia Park, ma o le a avea ai foi lea ma uluai taaloga faitaulia faavaomalo a le Manu Samoa, a o toe tapenapena atu ai mo le Ipu a le Lalolagi lea o le a faia i Egelani i le 2015.
Sa oo atu le taitai Malaga a le ‘au a Sikotilani, Douglas Potter i Apia i le vaiaso talu ai, e faatulaga fuafuaga uma mo lenei taaloga faitaulia, ina ia faamautinoa uma mea o le a faatalitalia mo lea faamoemoe.
Sa asiasia foi e le alii taitai Malaga vaega uma e moomia e pei o le paka o le a fai ai le taaloga, o fale matamata, ma na ia faaalia lona matuā fiafia ma faamalieina i le tulaga lelei ua tulai mai ai vaega uma nei mo le faatinoina o taligamalo i taaloga i Samoa.
E 3 taaloga faitaulia poo Tests ua faatulaga mo le Pacific Tour a le au a Sikotilani.
O nei taaloga faitaulia o le a faia i le va o le ‘au a Sikotilani ma le ‘au a Ausetalia, Fiti ma le Manu Samoa. Faaalia e le alii taitai Malaga, le matuā sauniuni o le latou ‘au i le taaloga mulimuli lenei ma le Manu, auā e lē gata ua nofouta uma ‘au i le malosi ua iai nei le taalo a le Manu, aemaise foi o lea o le fai lava i luma o le maimoa a ona tagata tapuai.
Lona uiga, o le a lē sau faatemeteme Sikotilani i le la feiloaiga ma le Manu Samoa.
