O le susuga Hans Joachim Keil e silafia e le toatele i lona suafa o Joe Keil, o se tasi o sui faavae o le faalapotopotoga o le Faatāua le Ola. Sa avea ma faipule o le Palemene mo nisi o paea’iga i tausaga ua tuanai.
O lona olaga galue i pisinisi ma auaunaga i upufai o le Malo, sa lē tuua ai lona naunau e faamaopoopo le faalapotopotoga sa lotolotoi ai ona o le naunau e fesoasoani i tagata o le atunuu e faasao o latou soifua mai le pule i le ola.
O le saunoaga lea a lona faletua o Celine Keil ina ua faalauiloa le savali o le ola o lenei tausaga a le faalapotopotoga o le Faatāua le Ola, ua avea ai lona toalua ua maliu ma autu o le savaliga i le faamoemoe e saili ai ni seleni e faatupe ai galuega a le Faatāua le Ola.
O se faalapotopotoga i Samoa o loo fesoasoani i polokalame faalauiloa e ofoina ai fautuaga mo tagata ua aafia i ni mafatiaga o le mafaufau ma le tino, aemaise o le naunau e faasao o latou ola. O le faletua le susuga Papalii Caroline Paul Ah Chong o le Faatonu o le Faatāua le Ola na ia faailoa o le avea o Joe Keil ma autu o le savaliga mo le ola e faia i Samoa i le Aso Toonai o le vaiaso nei, ona o se sui e finau tele mo le lelei o le faalapotopotoga ona e naunau e ofo le fesoasoani mo tagata mafatia, aemaise pe a aafia le mafaufau o se tagata i ni lagona e faia ai se faaiuga e pule i lona ola.
O le tausaga nei ua atoa ai le valu o savali mo le ola a le Faatāua le Ola, o se faamoemoe na amatamea ai nisi o taitai o le atunuu e pei o le susuga Rev Oka Fauolo ua tuumalo, o le afioga i le Tui Atua Tupua Tamasese Efi sa avea ma Ao o le Malo, faapea le afioga Misa Telefoni sa avea ma sui Palemia o le atunuu i tausaga e tele ua mavae.
O le afioga ia Misa Telefoni o se tasi o sui na faavaeina le Faatāua le Ola. Ua aumau nei o ia i Niu Sila ae na faaalia e Papalii Caroline, a malaga i Samoa e lē mafai ona tuua lona fesoasoani i le faalapotopotoga.
O le tupe pito maualuga na aoina e le Savali o le Ola poo le Walk For Life e 60 afe tala i le tausaga e 2012, lea sa autu i le faatāua o le tautua a le susuga Rev Oka Fauolo.
Faaalia e le Faatonu o le Faatāua le Ola, o le ‘afa o lea tupe na aoina i le agalelei o le toatele sa lagolagoina le afioga i le Tui Atua Tupua Tamasese Efi, a’o avea ma Ao o le Malo auā o ia sa taimua i savali o le ola i lea tausaga ma tausaga na sosoo ai.
E tolu tausaga o faatino galuega a le faalapotopotoga i lea seleni na aoina. O le faamoemoe foi lea o le savaliga i le Aso Toonai a sau nei le aso 10 o Novema 2018.
