Ole fale pumoomoo lenei o nonofo ai le tamā ia Siaki Pita ma lona toalua ia Moli Pita ma le la fanau e toafā ile afioaga o Lifa i Fasitoouta. Ole latou fale lenei na vave ona toe fausia ina ua talepe i lalo ele afā o Gita le latou fale sa iai.
Ua ono tausaga talu ona aumau ai lenei aiga talavou ile nofoaga lenei, e na’o le tamā ia Siaki e faigaluega ise tasi o kamupani i Ululoloa lea e nate maua ai se totogi e $140 ile vaiaso, o lea vaega tupe e faasoasoa ai mo aoga ale fanau e toalua faatasi ai ma meaai ole vaiaso, faapea pasese ale tamā ile pasi e usu mai ai e faigaluega.
Ole manaoga numera tasi o lea aiga o iai nei, ole vave fia maua lea ose tanevai e faafaigoife ai le latou galuega o faia i aso uma, ole savali mai lea ma paelo e utuvai atu i o latou aiga ile aai, e fai ole mamao ole savali mai i tai ae ole a’e foi i luga ole auala pe a toe foi atu ma paelo vai agai i uta.
Saunoa le tamā talavou ia Siaki, atonu ole manaoga a nisi o aiga o lo latou pitonuu, ole fia oo atu lea ose paipa mo le suavai maua, ma ole manaoga foi lea o si o latou aiga peitai e iai lona talitonuga e tele ni tausaga e talitali ai lea manaoga ma e lē o mautinoa foi poo afea ni aso e oo atu ai se paipa i o latou fanua. Ae ole manaoga o si ona aiga o iai nei, ole fia vave maua lea ose tanevai e faatino ai a latou galuega i aso uma ma feinu ai.
Ose tasi o vaega na molimauina ele Talanoa mai Samoa i lea aiga, ole faaaogāina pea lea ole fale’eli (toilet) se’i tulou. Ole mau a Siaki, e na’o le pau lea ole ituaiga faleui e fetaui tonu mo lona aiga ile taimi nei auā e lē manaomia ai se suavai mo lea ituaiga o faleui, ae ana faapea ua oo atu le suavai paipa pe iai foi se latou tanevai atonu ua autilotilo loa ise isi faleui e faaaogāina ai le suavai.
Ta’ua e lea tamā, ua leva ona ia manatu e faatau se latou tanevai mo lona aiga peitai e lē gafatia e lona totogi o iai nei ona o lana galuega ole taumafai lea e lei pa maa ise tasi o kamupani o faigaluega ai, ole tupe foi o maua mai i lona totogi e alu uma i aoga ale fanau aemaise foi ole faasoa ole vaiaso. E usu le tamā ile galuega i aso uma ae ole tina e tapena lana fanau e toalua ile aoga faatasi ai ma le fanau laiti o nonofo ai ile fale.
Ose aiga oloo tau faufau pea lo latou fale talu mai aafiaga na aafia ai ile afā o Gita talu ai nei, ma e lei ola foi le eletise talu mai uaea eletise na faaleagaina i lea afā. Ose aiga foi latou te lē o silafia le tele o mea o tutupu i isi vaega ole atunuu ma le lalolagi ona e leai foi se TV ma se leitio. Ta’ua ele tina ia Moli, e moni lava e lē o iai se fale lelei o nonofo ai ma le aiga ile taimi nei, ae taumafai lava ina ia ave le fanau ile aoga, ia popoto ma atamamai ma ia aua ne’i toe ui mai ile auala e pei ona iai laua ma le tamā ia Siaki.
Sa nonofo muamua lenei aiga ile aiga o Moli i Manono, ae ole ono tausaga talu ai na malaga atu ai ma faamautu lo laua aiga ile nofoaga lenei o Lifa i Fasitoouta ile aiga ole susuga ia Siaki. Na ta’ua ele tina ia Moli, e lē maua e si ana fanau le tele o mea feilafi o maua e isi taimaiti ma le tele o meaai eseese, ae vaaia lava le ola fiafia ole fanau ile mafuta faatasi ma mātua i aso uma.
E tele foi nisi o faatoaga ma mea totō a lenei aiga na matuā saua ai le afā o Gita, ma ua amata ona toe tapena ma toe totō le tele o vaega sa faaleagaina e fesoasoani ai ile aiga aemaise o aoga ale fanau.
