O le tatalaina o le nofoaga fou sa fausia faapitoa e ogatotonu i ai faafiafiaga ma tafaoga a malo mai fafo, a o iai i Niu Sila i le vaitaimi o le taamilosaga lakapi o le Ipu o le Lalolagi, sa vaaia le tumutumu i ai o le toatele o tagatānuu eseese, ona o le fia maimoa ma le molimauina o lea foi nofoaga tele.
O luga o le uafu o le tuputamaitai, Queens Wharf i le taulaga tele o Aukilani, o loo faatietie ai le nofoaga ua faaigoaina o le Ao, poo le The Clouds.
O fale umi ma sa fauina ma tuufaatasia e foliga o se ao umī, e vaaia i le vanimonimo.
Ona o le uiga o le igoa Aotearoa, ‘o ao uumi lanu papa‘e’ (long white or clear clouds).
O le ala lea o le fausia ai o lea nofoaga e fai ma vaaiga ma faamanatu o le uiga o le igoa Aoteroa, a o tumutumu ai Niu Sila i tagata mai atunuu eseese.
Ae o se vaega o le sauniga faapitoa i le tatalaina o lea nofoaga, sa faatulagaina ai le tatalaina aloaia o se poloketi sa faaigoaina o le True Pacific. O se polokalame sa faatautaia e le faalapotopotoga a le Pacific Cooperation Foundation.
True Pacific & Pacific Co-operation Foundation
O le poloketi a le True Pacific , sa fafauina e le faalapotopotoga soofaatasi a le Pasefika e pei ona faavaeina. Sa taulai lea faalapotopotoga i le aumai ma le tuufaatasia o oloa e gaosi lava i totonu o atunuu uma o le Pasefika, ma ia faalauiloa atu i atunuu i fafo.
I totonu o le Pasefika, o loo iai le tele o oloa ma le tamaoaiga e maua, i ona lava ogasami ma ona laufanua.
O le tuna, o le sua o le nonu, o le vanila ma le kofe, o ni oloa e tatau ma e mafai ona faatau lautele atu i le lalolagi.
Peitai o le faafitauli o loo tulai mai, o le lē lava o avanoa e faalauiloa ai ma faalautele mo le silafia. O le saunoaga lea a le tamaitai o Meg Poutasi, o le Faatonusili o le faalapotopotoga soofaatsi, sa taiulu i le faamoemoe ma le poloketi a le True Pacific.
E toalima le aufaipisinisi a Samoa sa auai i lea faaaliga tele, sa faia i totonu o le Ao, poo le Cloud e pei ona sa tatalaina. O le kamupani a le CCK Trading, o le Nonu Samoa, Women in Business, Natural Foods Company International Ltd, ma le Apia Bottling. Sa tofu lava ia kamupani mai le atunuu, ma a latou oloa sa auina mai ma faalauiloa, ma sa faatauina ai foi i lea lava aso.
O le CCK sa latou aumaia le sua o le nonu (Noni Juice), noni powder, ma le honey. O le susuga ia Shayne Sanft sa fai ma sui o lea kamupani e faalauiloaina a latou oloa.
O le Nonu Samoa, sa aumaia le isi ituaiga poo le isi tofo o le sua o le nonu (Nonu Juice), ma o le faletua ia Mosiula Vui, sa auai mai e fai ma o latou sui.
O le Women in Business, sa taitai mai e le tamaitai pule o fefaatauaiga, o le alo tamaitai foi o le alii Palemia o Samoa, le susuga ia Alberta Malielegaoi, ma o suauu mai le popo ma le misiluki sa fai ma o latou sao i lea faaaliga tāua.
O ituaiga sosi eseese, (chillie sauce, chillie mince, whole processed chillie) sa auamaia e le susuga ia Papalii Ryan ma le faletua, mai le kamupani a le Apia Bottling.
Sa vave tele le faatauina atu o snacks chips, e gaosi mai le talo, ulu, fa‘i ma le manioka (taro, breadfruit, banana, cassava). O le kamupani a le Natural Foods International Ltd, sa latou aumai ia taumafa ma oloa a le atunuu, ma o le susuga ia Papalii Grant Percival ma nisi o le aufaigaluega sa faatasi mai ai.
O le honey mai le kamupani a le CCK, sa faamaonia i le aso muamua o le faaaliga le mae‘a lelei, ma na uma e lei taina le lua i le aoauli. Na taua e Shayne e faapea, sa faanoanoa tele ona ua mae‘a lea oloa, ae sa toatele pea i latou sa fesiligia ma manaomia.
O le molimau a Papalii Percival, na silia ma le ‘afa o lana container na aumai na mae‘a ona faatauina i le aso muamua, ma sa ia talitonu o le a mamā le pusa oloa i le aso lona lua o le faamoemoe.
O se tasi o tulaga manuia sa ta‘ua e Papalii Percival i se feiloaiga ma le Samoa Times sa ia faailoa ai, ua mae‘a ona faia feutagaiga ma le kamupani tele a Ausetalia i Niu Sila, le Progressive, mo le maketiina o ana oloa.
O loo tālia nei se faaiuga mai lea kamupani, peitai e ui ina tālia se tali, ae ua mautinoa lava e le alii pule o le Natural Foods, o le a ioe ane le Progressive mo se feagaiga e unai mai ai snacks mai Samoa, ma faatauina i ana maketi i Niu Sila.
Sa faamaonia foi e le tamaitai o Alberta Malielegaoi, le saoasaoa tele o le faatauina o a latou oloa sa auina mai, aemaise lava o suauu mai le popo ma isi. Ina ua fesiligia Alberta i sona finagalo sa ia ta‘ua ai, o le mea moni ua ia faamaonia, e lē tau sailia ni maketi o le suauu a Samoa, pe afai ae iloa tele e tagata ma isi atunuu o le lalolagi.
Ae na pau le tulaga ma le faafitauli i le taimi nei, e lē o lava le faalauiloaina faalauaitele o oloa a Samoa.
O le ala foi lea na taumafai ai e auai mai, ona o le faaaogāina tatau o le avanoa, ma ua fiafia tele i le tali ane o tagata sa afea lea nofoaga.
Sa faafiafiaina tele le susuga ia Shayne Sanft mai le kamuapni a le CCK, ona o le mae‘a lelei o lana honey na auina mai. Ua fai lea ma faamaoniga, ua leva ona tatau ona telē se maketi mo le honey ma isi oloa e pei o nonu ma le kofe.
O le uma o le honey na faatau atu o se faailoga tāua tele lea, o le a toe sauni i ai mo le sailia o nisi maketi i isi vaega o le lalolagi mo ia oloa.
O le kofe a Samoa, o le isi lea oloa sa matuā manomia tele, ina ua tofo e le toatele o tagata. O tamaitai papalagi mai Kalaiesetete ma le kamupani a le C1 Espresso, sa nafa ma le faalauiloaina o le kofe. Sa matuā fiafia tele le pulega a lea kamupani, ona o le tali ane a le toatele, ma faailoa le fiafia tele ma le naunau e faaaogā le kofe a Samoa.
Ua silia ma le tausaga o faaaogāina e le kamupani lea a Niu Sila, le kofe mai Samoa i totonu o le latou faleaiga ma le pa taumafa kofe i Kalaiesetete.
O le molimau a ia tamaitai ina ua feiloai atu i ai, sa ta‘ua ai e lei toe sailia se isi kofe mai se isi atunuu, ina ua maua ma faataitai ma tofo i le kofe mai Samoa, e tulaga ese i le latou faatulagaina o lea foi oloa, mai atunuu uma sa auina mai ai a latou oloa muamua.
Galuega Taulima
O le susuga ia Paul ma le faletua ia Vivian Phillips, sa aumaia le tele o galuega taulima, o meafaitino faufau, i ata eseese, ma lona tuufaatasia ina ia faaaogā ai le tele o galuega e gaosi lava foi i Samoa, sa maitauina le maualuga o le faatinoina, ae sili ai ona maualuga le tulaga na oo i ai i le faatau a le toatele o malo sa auai ane.
Na ta‘ua e le faletua ia Vivian le fiafia tele foi i lea tali ane, ma le taunuuga o faatauga i aso sa faataunuuina ai, ona o le alumia ma le taulia o gaioiga ma taumafaiga sa gaosi mai lava i Samoa.
O se tulaga maoa‘e ma le faatupulaia ai o le fiafia pea e atina‘e ma faufau nisi meafaitino e faaaogā i ai taleni mai le Atua.
O le Aso Toonai na tea nei na tele ina toe taliu ai le toatele o le aufaipisinisi sa malaga mai i lea faamoemoe, ma lipoti ma molimau lelei mo oloa a le atunuu, atoa ai ma le faamaonia, o loo iai le manaomia i atunuu i fafo o oloa a Samoa.
