Manaomia Ekalesia Katoliko le siitia o taulaga

Ua ave le tuualalo a se sui o le Ekalesia Katoliko i le aoao tetele o le ekalesia i ona tagata lolotu ina ia galulue faatasi e faatupe le totogiina o aitalafu o loo feagai ma le ekalesia e mafua i le faatinoga o ana galuega ma atinae.
O le afioga Tuala Oloialii Koki Tuala o se tasi o sui o le ekalesia o loo i totonu o le faamaopoopoina o seleni faaalu i fuafuaga eseese a le ekalesia sa ia faamalamalama le lipoti o le tala o le tupe i le sinoti aoao a le Ekalesia Katoliko sa usuia i le lua vaiaso talu ai. I le faasalalauina e le faletelevise a le ekalesia o le faamalamalamaina o lea lipoti na saunoa ai le afioga Tuala, e tusa ma le 23 miliona tala o loo nofo aitalafu ai le ekalesia i faletupe ma kamupani eseese i le atunuu.
O loo manaomia e le ekaleisa aoao le 3 miliona 700 selau afe i le tausaga e faagaioia ai ana galuega ma ausia lea aofaiga i faiga taulaga ma isi auaunaga o loo maua ai seleni. Na faaalia e Tuala e lē toe agai le ekalesia e faia ni aitalafu.
Ua faailoa foi e lea sui o le ekalesia i lana folasaga e na o le 60 afe tala o loo maua i le masina mai faiga taulaga ma tupe maua mai le faatoaga i Moamoa, ma seleni o loo maua mai i isi auaunaga e pei o le faia o pepa papitema.
O le aofaiga lava ia o tupe e maua mai taulaga i le tausaga atoa e na o le luaselau ma ona tupu afe, pe a fua i seleni o loo manaomia e faatino ai galuega a le ekalesia e manaomia le 250 afe i le masina.
Ua iai nei le faiuga a le komiti o tupe a le ekalesia e taofi le faagaioia o nisi o ana galuega tau atinae ae se‘i toe iloilo nisi faiga e faagaioia ai ona o le tulaga utiuti o seleni maua. O le meaalofa tupe o loo maua mai le malo i tausaga taitasi o loo pito telē le seleni o loo tuuina atu e fesoasoani ai i aoga a le Ekalesia Katoliko lea e silia i le miliona na ave i ai i le tausaga nei. E lima miliona lea fesoasoani a le malo i tausaga uma ma o le tausaga fou o le a siitia i le ono miliona.