O le fualaau faasāina o le ‘aisa, ma le kokeni ua ulufale i Samoa, ae o le fesili e faapefea ona sao i le atunuu nei pauta ma fualaau faasāina. O aupega poo laau malosi e lē faatagaina i Samoa ua faapea ona mafai ona ulufale i le atunuu ae o le fesili lava lea e tasi pe faapefea ona tupu lea tulaga.
O le galuega lea o loo feagai nei ma le vaega o solitulafono faavaomalo a le Pasefika le Trans National Crimes Network o le mataitu o faiga ma auala a tagata o loo feaveai ai.
I Samoa na faaalia e le Komesina o Leoleo le susuga Egon Keil, e lē o faatamala le Malu o le Malo ma isi auaunaga e pei o le Ofisa o le Tiute i le mataitu lelei o oloa o loo faaulufale i le atunuu aemaise o isi mea o loo aumai i le atunuu e mafai ona avanoa ai ma le ulufale o pauta ma fualaau faasāina faapea ma aupega.
O nisi o solitulafono faavaomalo o loo mataitu e le vaega o solitulafono i le va o atunuu o le Pasefika o tupe e feaveai i le va o atunuu e faatino ai ni faiga solitulafono lea e ta‘ua o tupe eleelea poo money laundering.
O solitulafono foi i le feaveai o tagata i ni auala e solitulafono ma le faia o uiga faatalitane o nisi ia o solitulafono o loo tutupu mai i le va o atunuu. O Samoa lava ia na faaalia e le Komesina e le mafai ona ‘alo ese mai le aafia i nei ituaiga o gaioiga peita’i o le taua lea o le galulue faatasi o atunuu ile sailia oi latou e faia ma tuuina atu ile faamasinoga.
O Amerika Samoa e leo avea ma sui o atunuu o le Pasefika o loo mataituina faiga solitulafono faavaomalo. O le mafuaaga lea o se finagalo o le alii Komesina o le a ia galue e fautuaina lea itu o Samoa e avea ma sui.
Fai mai le alii Komesina e tele solitulafono faapenei o loo aliae mai i Amerika Samoa e faasino i pauta ma fualaau faasāina aemaise o aupega poo laau malosi. “Ou te iloa e tele mea o loo tutupu i Pago, ae tāua le omai e tatou te galulue faatasi.”
O le vaiaso ua mavae sa usuia ai i Samoa le fonotaga a atunuu o loo i totonu o le lio o galuega tau solitulafono faavaomalo. O le alii Komesina o Leoleo mai Samoa ua avea nei ma taitaifono.
O lana galuega o le a liliu e faatino i lona avea ma taitaifono o le saili o nisi auala lelei e fesoasoani ai i atunuu ma aumai i totonu Amerika Samoa.
