O se talosaga lea a le alii o Ashmed Fareed na tuu atu i le Faamasinoga Maualuga ina ua toe fofogaina lana talosaga lea ua i luma o le Faamasinoga Maualuga faatatau i le faaiuga ua faasala faafalepuipui ai lenei alii i moliaga o le gaoi a o avea ma tagata faigaluega.
A o faagasolo ai la lana talosaga, na faaalia le fanoga lenei o le alii Pakisitana ona o lona manatu e manao lava ia e saunia lana mau tusitusia e faatatau i lenei talosaga. Peitai o le nofosala ai i le toese i Tafaigata na ia ta‘ua ai ua le mafai ona faia lea tulaga.
O Ahshed Fareed na tuuaia i le ave faagaoi o taavale e 25 mai i le kamupani o le Alnima Motors na pule ai ma faatau i le kamupani fou o le Singapore Motors ina ua avea foi o ia ma pule o lea lava kamupani taavale. O le toe foi ma la o tagata Pakisitana e ana le Alnima Motors ma maua ai lea tulaga na ave ai loa le tagi lea ua faamaonia ma ua faasala faafalepuipui ai lenei alii.
O le aso lava na tu atu ai le faaiuga faasaga i le alii Pakisitana na talosaga ai lana loia ina ia saili se isi auala e tuli ai le faasalaga o lea alii ona o le manatu e tatau ona avane se isi faasalaga faatatau i lenei alii – ia ese mai i le sala i le toese. O le tali a le faamasino na faatautaia lea mataupu, e lē ese Fareed ese isi tagata o le atunuu e faamaonia foi solitulafono faapea.
Na faaalia e le faamasinoga e tuli pea le faasalaga faafalepuipui o lea alii ae faatali ai le tuuina atu o lana talosaga apili lea ua faaali e lana loia o le a tuuina atu i luma o le Faamasinoga.
O lea la ua toe tulai Fareed i luma o le Faamasinoga ma o ia lava na faia le talosaga i le Afioga Patu Tiavasasue Falefatu Sapolu le alii Faamasino Sili lea e foliga mai o le a fofogaina le talosaga a le alii Pakisitana.
“Ou te talosaga atu ma le agaga faaaloalo pe mafai ona avatu i le falepuipui la‘u masini ma nisi o meatotino, ou te saunia mai ai e a‘u lava ia la‘u faamatalaga tusitusia,” o le saunoaga lea a Fareed. “Ou te fia tapenaina lava sa‘u lava mau e tusa ai ma le mataupu ua molia ai a‘u.”
Na tali le Alii Faamasino Sili e talanoa i malu o le malo e tusa ai ma lea talosaga. “O le itu oloo e talosaga mai ai, e mafai ona faaoo lau talosaga i le Ofisa o leoleo ma avatu ai mea nei oloo e moomia ma e tatau ona oo atu i le aso e toe valaauina ai oe i luma o le faamasinoga ua mae‘a ona tapenaina lau faamatalaga tusitusia,” o le saunoaga lea a Patu.
O le susuga ia Fareed oloo nofosala i le falepuipui mo tausaga e fa ina ua mae‘a iloiloina lona faamasinoga i le masina ua mavae ma ioeina ai nisi o ona moliaga o le gaoi a o avea ai ma tagata faigaluega.
Ua toe tolopoina ai la lenei mataupu poo le apili na talosagaina e Fareed, mo le aso 25 o le masina nei ma toe faaauau ai nisi o taualumaga o lea lava mataupu.
E le masani ai ona tuu atu manaoga faapea a i latou ua nofosala faafalepuipi ae o loo tālia pe talia e le ofisa o Leoleo le finagalo o le alii Pakisitana.
