Ua faaalia faalauaitele nei e se tasi o tamalii iloga i le taaloga Lakapi, ma o se tasi foi o faamatua i le All Blacks, Laauli Michael Jones, lona finagalo ina ia toatele nisi e unaia malosi le Komiti o Taaloga Lakapi le IRB, ina ia vave ona suia ai tulafono i le taofiofi o tama taaalo ma saisaitia ai pe a mae‘a ona saini konekarate ma atunuu o loo taaalo ai, ina ia avanoa e taaalo mo o latou atunuu e iai o latou piitaga.
O Niu Sila nei le atunuu lea e matuā malosi ai lea faiga, o loo pologa ma taofiofi ai le toatele o alo taaalo ma tama Pasefika e aofia ai ma Samoa, se‘i vaganā ua mae‘a ni taimi ua tuupoina, e tusa lava pe na o le tasi le taaloga i le Olopeleki pe na o le saini lava i le Iuni Lakapi a Niu Sila ae lei ofu i le Lanu Uliuli.
Ua faapea foi ona faailoa i ai le lagolago a le alii Palemia o Niu Sila o John Key, ma le Minisita o tapenaga o le Ipu o le Lalolagi o Murray McCully i lea manao o Laauli, ae na saunoa le Palemia atonu ua fai si tuai mo le Taamilosaga o le Ipu i le tausaga fou.
O le tulafono o loo iai nei e 4 tausaga e lē mafai ai ona toe taalo se isi i se au faavaomalo a se isi lava atunuu pe afai na taalo muamua i le au a se isi atunuu.
O se faataitaiga afai o se tama Samoa ae na taalo ia Niu Sila i le 2009, faato‘ā mafai ona faataga mo Samoa i le 2013. Peitai na toe faaalia e le Palemia e tatau ona faaaogā lelei i ai le mafaufau o le tama taalo.
Ua fetaui le toe laga e Michael Jones o lea mataupu i le vaiaso na tea nei a o feagai ai John Key ma le Fono a Taitai o le Pasefika le Forum, lea sa usuia i Vanuatu.
Saunoa Laauli, o se vaaiga matagofie ma faafiafiaina mo le maimoa ma le agai i luma o le taaloga, pe a suia lea tulafono ma malolosi mai ‘au a le Pasefika.
E lē o se taimi muamua lea ua faalogoina ai lea mataupu, ae o lea faato‘ā lagona lea o se leo o se tasi na fai ma tupu i le numera 7 a le All Blacks i ona vaitaimi, ae o lea foi e foliga lagolago i ai le Palemia.
Ia talosia ia ae tau lau o lea mataupu. Afai e lē fetaui mo le Ipu i le tausaga fou, ae o le mea tāua ia sui i le taimi lata mai.
