A o faia ai suesuega a leoleo i le mataupu ua tolu vaiaso talu ona tupu e pei ona tuua‘ia ai le aiāina e le Sui palemia o le tiute o leoleo, ae masalomia le minisita lagolago o Muagututagata Peter Ah Him i le tagofia o le avamalosi a o ia faatautaia se taavale a le Malo, ae ua faaalia e le Fofoga Fetalai o le Palemene, e lē mafai ona faia sana faaiuga i le mataupu ona e lei maua le taunuuga o suesuega a leoleo, auā o le isi laasaga e sosoo ai e pei ona ia faaalia, o le faamasinoga pe a faapea e faia ni moliaga.
I le fono a le Itu agai na latou valaau ai tusitala i lenei vaiaso ua faaalia ai e le taitai le faanoanoa i le tulaga na tulai mai ona o taavale a le Malo na faaaogā e ia faipule o le Palemene.
Ua faaalia ai e se tasi o faipule o le Itu agai le tofa Levaopolo Talatonu, o se tuua‘iga ua tatau ai ona silasila le Palemia i se faaiuga pe ua tatau loa ona faasee tuagalu le Sui palemia ma se tasi o ana minisita lagolago mai le tauaveina o tofi faipule oo la itumalo.
Ua faaalia e le Fofoga Fetalai i sona finagalo i luga o se tasi o faletelevise, afai e oo le mataupu i le faamasinoga e faatali poo le ā se faaiuga, ona fua lea i ai o se isi gaioiga e tusa ma tulafono tumau.