O le tofa ia Ili Setefano Taateo Tafili le faipule o Aana Alofi Nu.2

O se tasi o sui faipule sa tauva ai i lalo o le fu’a a le Vaega Faaupufai o le Tautua i le faigapalota tele a le atunuu i le tausaga e 2016, le Tofā, Ili Setefano Taateo Tafili mai le Itumalo o Aana Alofi Nu.2, ua faaalia nei lona manaoga e fia tauva ai i lalo o le fu’a a le Vaega Faaupufai e puipuia aiātatau a Tagata, le HRPP mo le faigapalota tele a le atunuu i le tausaga fou 2021.
I le feiloaiga a le tatou nusipepa ma le tofā ia Ili Setefano Taateo Tafili na ia faailoa ai, na mafua lava ona tauva ai i lalo o le fu’a a le Tautua Party i le Palota o le 2016 ona o le manaoga a lona Itumalo, auā sa iai se tasi o sui sinia o le HRPP i lea vaitaimi le Afioga ia Tolofuaivalelei Falemoe Leiataua peitai o lona loto lava sa naunau e fia tamo’e ai i lalo o le Malo.
O lea ua faitau masina ona toe faia lea o le faigapalota tele a le atunuu i le tausaga fou ae o le naunautaiga o Ili, e fia tamo’e ai i lalo o le Malo mo le Palota o le 2021, peitai e usitai lava i le finagalo a lona Itumalo.
O lona naunautaiga e fia tauva mo le Malo ina ia faigofie ai ona faataunuu le tele o nisi o poloketi a lona Itumalo faatasi ai ma lona iai lea ma lipoi faatasi foi ma sui o le Malo i le tele o nisi o fuafuaga alualu mamao a le Malo o loo faataatitia nei. “O lea ua ou alu nei i totonu o faiga polokiki ma ou iloa ai le telē o le tāua o lo’u auai ai ma faitonu faatasi ma le vaega o loo faafoeina le sa o Samoa,” saunoaga manino lea a Ili.
E oo mai i le taimi lenei e lei faailoaina e Ili Setefano Taateo Tafili lona manaoga i lona Itumalo mo le fia tauva ai lea i lalo o le faamalu a le HRPP, peitai na saunoa Ili, afai lava e finagalo lona Itumalo e toe tauva ai mo le Tautua poo se isi vaega faaupufai, o le a ia usitaia lava le finagalo o lona Itumalo, ona o le tofi e lē o se tofi mo ia ma lona aiga, ae o le tofi mo le Itumalo, e filifili foi e le Itumalo lona sui tauva.
E iai le talitonuga o le alii faipule e moni sa ia tauva talu ai i lalo o le Tautua Party, peitai e lei aveesea ai le lagolago a lona Itumalo i le tele o poloketi ma fuafuaga alualu mamao a le Malo ua mae’a ona faataatitia. Ae afai e faailo lona manaoga lenei e fia tamo’e ai mo le Malo i le tausaga fou ae lagolagoina e lona Itumalo, o se itu lelei lea mo ia ma lona Itumalo.
Na faailoa foi e le alii Faipule ua tele nisi o galuega o lona Itumalo ua mae’a ona faataunuuina i le fesoasoani mai a le Malo peitai o loo taatia nisi o talosaga i galuega a lona Itumalo ua mae’a ona tuuina atu ai se talosaga i le Malo.
O le lima tausaga foi mo se sui faipule, e lē o se taimi umi, e lē mafai foi ona faataunuu uma ai nisi o fuafuaga o loo e manao i ai mo lou Itumalo. Ma o lona lea naunautaiga mo le Palota o le 2021 ina ia toe manuia mai ai ana taumafaiga, e lē gata i le faaauau ai o galuega tuua i lona Itumalo ae o le fia faia pea o sona sao i le Atunuu manū o maua lona taimi.
Faailoa foi e Ili Setefano Taateo Tafili, e iai lona talitonuga e lē faigata le faigapalota i le tausaga fou mo le Malo ona o le tele o galuega ua faia e le Malo e ui o loo iai pea nisi o le atunuu aemaise i latou o loo aumau ai i atunuu i fafo o loo faitioina pea le Malo. E iai le talitonuga o le alii faipule e toe faigofie foi le toe manumalo ai o le HRPP i le faigapalota o le 2021.