O le finagalo lea o le tamā ia Maioa Tasala, o se faifaatoaga mai le afioaga o Tuanai sa auai i le a‘oa‘oga faapitoa lea na faatautaia i le Ofisa a le Matagaluega o Faatoaga i Nuu.
O lea faatasiga ua faatautaia mo le taimi muamua e unai ai nisi o le aufaifaatoaga o loo iai le naunautaiga e faatino le atina‘e o le nonu, ona o lea ua mafai ona maua le avanoa e maketi pe faatau atu ai le sua o lea laau i le malo o Saina.
O le agaga o le Matagaluega ina ia lava le nonu e avatu i fafo, auā e leaga le maua mai ma le tatala mai o maketi ae uma ane foi e lē mafai e Samoa ona tali atu i le manaoga mai i fafo.
E pei ona ta‘ua e le faifaatoaga ia Tasala, ua tele ni atina‘e sa folafola muamua atu e le Malo le unaia ona o avanoa e faatau atu ai i atunuu i fafo, peitai e lē umi lava se taimi ae toe faamuta ona ua iai se faaletonu i le va ma kamupani nei o loo latou auina atu le tele o nisi o fua o faatoaga e pei o le talo, fai, koko ma nisi.
O le tali a le Malo i faitioga nei a faifaatoaga, o lea la ua mautu mai maketi, aua ne‘i toe faamaamulu faifaatoaga ae tatau loa ona agai mai e saili lelei auala e faaauau ai lenei auaunaga ma faaauau ai le tupe maua a faifaatoaga ma o latou aiga.
“O lea ua toe maua foi le avanoa lenei e atina‘e ai le nonu ma o se taumafaiga ou te talitonu e lē tele se galuega e fai ai ona e lē o se laau e tau faaaogā ai ni vailaau e faaola ai ma atonu o le a faigofie lona atina‘ega,” o le saunoaga lea a le tofa ia Maioa Tasala.
Na ia ta‘ua foi talosia ae tumau ai pea le lelei o le tau o le nonu lea ua iai e $9.00 i le paelo pe tusa lea o le 14kilo.
Na ia saunoa foi o le a avea lona tomai o le a maua mai i lea a‘oa‘oga e faatino ai lana faatoaga nonu, ma o le a ia taumafai lava e unai lea atina‘e ona o le a tele se tupe e maua mai ai.
I le saunoaga autū a le Afioga i le Ofisa Sili o le Matagaluega o Faatoaga, Vaomatua ma Faigafaiva, le susuga Fonoiava Samuelu Sesega na ia ta‘ua ai, o le sini o le faatino ai o lenei a‘oa‘oga ina ia faailoa i faifaatoaga nisi o auala e faafailele ai le nonu.
“O le nonu e lē o se laau e tau totō, ua tele ina ola lava latou i totonu o fanua, ma o le auga ina ia tatou laa i se tulaga o le faafailele lelei o le nonu e pei o le faia o se faatoaga.
E lē tatau ona toe o i le togavao e tau mai ai le nonu e pei o ia aso ae ua tatau ona tau mai i le faatoaga”, o le faalauaitele mai lea a le afioga i le Ofisa Sili.
E lua ni kamupani a le tamalii ia Jack Chen i Niu Sila lea ua mae‘a ona sainia le feagaiga ma le kamupani a le Pure Pasefika Samoa auā le maketi atu o le fua o le nonu i le Malo o Saina, ma o loo faatautaia foi a‘oa‘oga mo le toe atina‘e o le ‘ava ma le honey auā le auina atu fafo.