Na faia e le Atua mea uma e faaalia ai lona mamalu. O le ā le mamalu o le Atua? O le Atua lava ia.
O le silisili o lona natura, o lona matautia, pupula ma lona matagofie, o lona mana, ma le siosiomaga o lona mamalu. O le mamalu o le Atua, o le faaalia lea o lona lelei e faavavau.
O fea e iai le mamalu o le Atua? Silasila i ou autafa. Auā o mea uma o e vaai i ai na faia e le Atua e faaalia ai lona mamalu.
Tatou te vaaia i soo se mea, o mea e sili ona faatauvaa e oo lava i le vanimonimo ma lalolagi o paneta eseese, o le oso a‘e ma le goto ifo o le la, o fetu, o tau ma vaitau o le tausaga, o le foafoaga, o loo faaalia ai le mamalu o le Atua.
Ua tatou iloa le matautia o lona malosi, e fiafia foi o ia i le uigalasi o mea na faia, e fiafia i le matagofie ma le felanulanuai, na ia fuafua ma faatatau lelei le faiga o mea uma, aemaise lona poto.
Sa faaalia le mamalu o le Atua i tagata. Amata mai Etena, sau ia Mose, sau i le falefetafai, seia oo i le malumalu. Toe faaalia mai ia Iesu seia oo mai i lana Ekalesia. Sa faaalia e ala i le afi faaniutu, o le ao, o le faititili, o le asu, ma le pupula uigaese. O le lagi, o le mamalu o le Atua, o loo malamalama ai.
O lona mamalu sa faaalia mai ia Iesu. O ia o le malamalama o le lalolagi, e faaalia mai ai le natura o le Atua.
Ona o Iesu, ua lē toe pogisa ai i tatou ma tau fesili pe faape‘ī le Atua. A ua ta‘u mai e le Tusi Paia, sa maliu mai Iesu i le lalolagi ina ia tatou malamalama i le mamalu o le Atua.
O le mamalu o le Atua e ia te ia, auā o ia o le Atua. O lona lea uiga ma lona natura. E lē mafai ona tatou faaopoopoina se mea i lona mamalu. Faataitaiga, e lē mafaia e tatou ona faia se mea e toe faasusulu malosi ai le la.
E lua mea na faia e ia ua toilalo ma lē avatua ai le viiga ia te ia. O agelu na tetee (fai ma temoni), ma le tagata.
Ua agasala, ma o le mafuaaga tutasi lea ua lē avatua ai i le Atua le mamalu. Ua alofa le tagata i isi mea e sili i lo le Atua. Ua faamaualuga ma tetee.
O le mea foi lea na pa‘ū ai Satani, faapea foi tatou. O loo tatou ola mo lo tatou lava viiga, ae lē o le Atua. E tele auala e avatu ai le viiga i le Atua, ae o ni mea nei se lima e fai ma Luitau mo oe.
1. E ALA I VIIGA
Fai mai C.S. Lewis, ‘O le faatonuga ia fai le taulaga o le viiga, o le valaau lea a le Atua i le tagata ia fiafia ia te Ia.’
E fia silasila le Atua i le taulaga o le viiga e faia mai le alofa, le loto faafetai ma le olioli, ae lē o se tiute. O le saunoaga a John Piper, ‘E matuā faamalieina le finagalo o le Atua ia i tatou, ina ua faamalieina o tatou loto i le Atua.’
O le viiga, e lē na ona pese ma tatalo, poo le foai atu foi o mea mo lana galuega. Ae o le foai atu lea o oe ma mea uma o ia te oe mo lona viiga. O mea uma foi e te faia, o taulaga o viiga ia i le Atua.
2. E ALA I LO TATOU ALOLOFA I ISI
Afai ua e fanaufouina, ua avea oe ma tagata o le aiga o le Atua. O le mulimuli foi ia iesu e lē na o le talitonu, ae ua avea foi ma tagata o le aiga, ma o le alofa la i le aiga o le Atua, e tāua tele.
O lo tatou tiute e fai o le alofa atu, e pei o le alofa mai o le Atua, auā o le Atua o le alofa lava ia. E viia ai foi o ia.
3. PE A PEI O KERISO
O le taimi lava tatou te fananau ai i totonu o le aiga o le Atua, ona finagalo loa lea o le Atua ina ia tatou matutua faaleagaga.
E faape‘ī lea mea? O le matua faaleagaga o le foliga lea ia Keriso Iesu i mea tatou te faia, o mea tatou te mafaufau i ai, poo o tatou lagona foi.
O le tele o lou atiina a‘e o uiga faa-Keriso, o le faateleina foi lea o le viiga o le Atua mai ia te oe. E avatu e le Atua ia te oe le ola fou ma le natura fou i le taimi e te talia ai Iesu.
E afua mai i, ona manao le Atua ia suia atili oe ma avea oe o se tagata e faamatuaina faaleagaga.
4. E ALA IA TATOU MEAALOFA
O tatou, e eseese uma meaalofa, agavaa ma taleni ua tuuina i ai e le Atua. O le ituaiga tagata na faia ai oe e lē se mea na tupu faafuasei.
O agavaa foi na avatu e le Atua e lē ina ia e manatu faapito ai. Na avatu ina ia manuia ai nisi, ma oe. Ae silisili ai, ina ia viia le Atua na ia aumaia ia meaalofa.
5. PE A TATOU MOLIMAU ATU
E lē manao le Atua i lona alofa ma lona finagalo ia faaufiufi. O le taimi lava tatou te iloa ai le mea moni, o lona finagalo ia ta‘u atu i nisi.
O se faaaloalo maualuga lea, o le faailoa o Iesu i isi tagata, ma le fesoasoani ia iloa e nisi le faamoemoe na soifua mai ai, aemaise le tapenapena mo le ola e faavavau.
Soifua.
