A o mou mālie atu i le vaai foliga lalelei ma le laufofoga fiafia o le tina matua ia Taliatalosaga Hytongue, ae fotuai mai pea uiga tausaafia, ma ua pei se ata faasolo i le nofoaalo ma fanau faapea aiga i taimi uma e talie ai ma talatalanoa.
O se tasi lenei o toe ulutaia o le atunuu, le tina matua ia Taliatalosaga Hytongue na tupuga mai i totonu o se aiga sa avea ma Misionare i tausaga ua tuanai. Sa femalagaai ona tuaa o Asafo ma Faaea i le Atu Pasefika i le tala‘iina o le tala lelei ma afea ai le setete o Niu Sa Uelese lea na soifua pe na fanau a‘e ai Taliatalosaga Hytongue.
O alalafaga e iloa ai i Samoa o Falefa, Moataa ma Vaiala. Na maliu o ia i le aso 6 o Oketopa, i le atoa ai o le 85 o ona tausaga. Sa femalagaai tuaa o Asafo ma Faaea i le Atu Pasefika i le tala‘iina o le tala lelei ma afea ai le setete o Niu Sa Uelese, lea na soifua pe na fanau ae ai Taliatalosaga Hytongue.
Na faaipoipo atu o ia i le tamā ia Puleamaalii Hytongue o Lotofaga. E 15 le nofoaalo ae 171 i latou uma na tupuga mai ia te ia.
Na taitaia le sauniga faaiu o toe sauniga i le Aso Faraile, aso 14 o Oketopa, e le lupe faalele a le aiga, o le alo o le tina matua, le susuga lea ia Ps Kirisimasi Hytongue (A.O.G Samoa).
O faafeagaiga sa fai sao, Failautusi A.O.G Samoa, Ps Taeauaga Frost, Peteru Faraimo, Rev Tavita Tanoa‘i, Ps Toluono ma le susuga i le toeaina, Rev Tauaaga Mataafa (Pulega EFKS Saute).
E tele nisi o toeaiina ma faafeagaiga sa auai faapea aiga malaga mai Amerika, Samoa, Niu Sila ma isi setete o Ausetalia, ona o le fia molimauina o toe taimi o si o latou tina matua ona toe pau ai lea o se tagata matua sa totoe o lea augatupulaga.
O le tofa ia Faate‘i Iosefa Iosefa na fai ma fofoga o le aso, ae tu i le tootoo le tofa ia Taavao Tapulolo‘u Malua Iosefa e faafetaia le mamalu o Samoa na potopoto. Na tasi moemoe le auvalaaulia i le tofa ia Fesola‘i Taualani Pritchard e molimolia se agaga faafetai i le maualuluga o faaaloaloga a aiga na lua.
O le tama matua o taumafa i Brisbane “Uncle Sams Catering” sa tapenaina le taumafataga.
