Māmā mafatiaga ona ua faatāua aiaiga faale-Talalelei

E talanoa loa i faalavelave e ono tulai mai, e talitonu lava e amo lua le mamafa o avega, e le gata o le mafatia i le misia o mafutaga motusia ona o le maliu ma le oti, ae o le seleni lava e talanoa i ai auā tulaga uma pei ona silafia i tu ma aga masani. O se vaaiga lea na molimauina i toe taimi o le afioga ia Notoa Masi Taula i Melepone.

O sauniga faaleaiga na faia i le Malumalu Ekalesia a le Aupaia o Aso e Gata Ai i le Uarota a Tullamarine i Glenroy Melepone, o ina sa faafailele ai le soifua auauna o Notoa Kirisimasi a o aumau i le Setete o Vitoria.

Sa taitaia le sauniga e le Peresitene o le Stake a Deer Park susuga ia Kalolo Paletasala Manu’a faapea le lagolagosua a le susuga a Bishop Larry Nonu ma ona fesoasoani (1) Fiu Talosaga Iosua Fiu ma le Fesoasoani (2) Fata Alofa Faauo Fuimaono, aemaise sui o aiganalua, Tausaga Taula ma Toilolo Paulo Taoa.

O molimau o galuega lelei o lea tuagane e le mafai ona mavae na ootia ai loto ma vaaia ai le tele o loifofoga maligi. O Notoa Masi na aumau i Brisbane peitai na siitia i Melepone ona o le faamoemoeina i se galuega sa galue ai.

E toafitu le nofoaalo ma na malaga mamao mai si ona tina o Lupe Taula mai Samoa, si ana fanau, uso ma tuafafine mai Niu Sila ma isi vaega o Ausetalia faapea aiganalua na vaaia le lolofi mai ona o le osiaiga.

O le tuua o le malo e le afioga ia Notoa Kirisimasi Taula mai le alalafaga o Taga i Savaii, o le lona tolu ai lenei o faamoemoe ua faia i le Uarota a Tullamarine ua faatāua ai aiaiga faale-Talalelei e pei ona tatai mai ma finauina e Taitai o le galuega ua mavae, ma sa lei faigofie le tauasaina mai o lenei manuia tāua e fesoasoani tele i aiga o le Talalelei.

E ui lava i se agaga masani o aiga i le toe teuina o ni paolo ma ni sii alofa peitai e ao pea ona mulimulitaia le tapu e pei ona autasia i ai aiaiga o le Talalelei ua faamalieina ai le tele o aiga.

E molimau nisi i le uiga tonu o le amo e sii atu e māmā, ma ua pei o se fiafiaga sili ma se faamamaavega lea tulaga, poo a tu ma aga na sau ai i aso ua mavae peitai, ua masani le tele o tagata lotu o le Uarota a Tullamarine.

O le tofa ia Tamala Tafeaga Sing Cho sa fai ma sui o aiga ga lua e momoli se faafetai ona o le lava tapena o le Uarota i le vaivela ma le malu afiafi. O le aso faaiu sa fetalai ai le tautalaga ia Faiumu Taula Faaeteete ona o le malu ma le nofoaga o le Uarota sa faaaogaina ma le laufofoga fiafia o tagata uma, ae tulai le tofa ia Aumua Eneliko Tuiolenuu e faaleoina se faafetai mai le paia i le Ekalesia.