E iai i le tulafono auala e mafai ai ona e tofia se isi e te faamoemoeina, e na te vaaia au meatotino ma faatonuga, ma fai mea e te manao e fai, pe a e lē iai i Niu Sila, pe iai se mafuaaga e te manaomia ai se fesoasoani faapea. O le General Power of Attorney lea.
O le isi ituaiga Power of Attorney o le ‘Enduring Power of Attorney; e ese mai i lea e ta‘ua i luga. O le Enduring Power of Attorney o se pepa lea e te tusia a o lelei lou mafaufau ma e malosi, e te tofia se isi e na te vaaia au meatotino ma fai ou manaoga tusitusia, i se taimi ua afaina ai oe i se ma‘i poo se faalavelave, ua e lē iloa ai se mea ma lē mafai ona e tautala mai e ta‘u mai se mea o e manao ai, ma ua leaga lou mafaufau (no longer have mental or physical capacity). Afai ae te‘i ua lē lelei lou mafaufau ona o se ma‘i po ua e lavea i se taavale afaina ai lou mafaufau, o le taimi lena e faaaogā ai le Enduring Power of Attorney lea na e tusia ma saini a o e malosi ma lelei lou mafaufau.
Ona o tatou ola tatou te lē taupulea faalavelave e tutupu faafuasei, poo ma‘i oso, e afaina ai le mafaufau, ma lē mafai ona fofoga mai se mea o manao ai,o le mafuaaga lea o lena tulafono. O le aogā lena o lenei avanoa i le tulafono, pe a faaaogā e tusia ou manaoga, i le taimi o e malosi. E lē na o tagata matutua ua fai ifo le soifuaga, ae aogā i tagata ua iai aiga ma fanau, ma tupulaga foi ua matutua ma faigaluega.
Ae o le auna o le Power of Attorney, o lau aiā lea i le tulafono e te tofia ai se isi, ma e faatagaina lena tagata ua e tofia e na te faia uma mea ua e tusia aloaia i se pepa lea e ta‘ua o le Power of Attorney. O se faataitaiga, afai e te alu ese ma Niu Sila e mafai ona tofia se isi i lalo o se General Power of Attorney e totogiina au aitalafu mai sau tupe teu i le Bank, ma e faatagaina lē ua tofia e na te sainia ni pepa e tatau ona saini a o e toesea atu i fafo. I lalo o le Enduring Power of Attorney, afai o mātua ua matutua, e sili le tusia i lalo o se Enduring Power of Attorney ni faatonuga o mea e manao e fai pe a ma‘i pe lavea i se taavale, afaina ai le mafaufau, le mafai ona tautala mai, i se mea e manao ai (no legal capacity). I lo‘u iloa e aogā tele ni sauniga faapea ona (1) e taofi ai le fia pule o se isi e toatasi, poo se matai, poo se isi o le fanau. (2) E faaititi ai foi femisaaiga o fanau i le taimi e fememeai, popole ma vevesi mafaufau. (3) E filemu ai lē o ma‘i auā o isi e ma‘i, e ui ina lē mafai ona tautala mai, ae e lagona vevesi ma ni fetauaiga ia e fai i ona tafatafa.
Pei ona ta‘ua i luga, e lua ituaiga Power of Attorney, i le tulafono.
• O le Power of Attorney e ta‘u o le ‘General Power of Attorney’
• O le ‘Enduring Power of Attorney’
O le Eseesega o nei Ituaiga Power of Attorney:
1. I lalo o le General Power of Attorney, e mafai ona e tofia se isi e vaaia mea e te manao e fai. E pule oe i sau tofiga, pe e te tofia se isi o lou aiga, sau uo, loia, faifeau, poo se trustee o se kamupani e te masani lelei ai. Soo se isi lava e te iloa e mafai ona e faamoemoe i ai o le a na faia mea e te tusia i lalo e fai. Ia e tofia se isi e te iloa e lē gata ina fai mea o loo e tusia e fai, ae o lena tagata e te faamoemoeina e faia lelei ou manaoga. O le tagata e te tofia, e te tofia i le taimi o lelei lou mafaufau, o le tagata lea, e mafai ona e faatonuina e na te faaaogā le General Power of Attorney pe afai ua e ma‘i, ae o loo lelei pea lou mafaufau, ma mafai ona e faatonu mea e te manao e fai i le tagata na e tofia. E pule oe poo le ā le lautele o faatonuga tusia e faia e le tagata lea ua e tofia. E lē lelei loa lou mafaufau, uma le aogā o le General Power of Attorney.
2. O le Enduring Power of Attorney, o le taimi e faaaogā ai au faatonuga i lau Enduring Power of Attorney tusitusia ma saini a o e malosi, e faaaogā lea i le taimi ua leai ai sou aogā faalemafaufau (no legal capacity). O le aogā la o le Enduring Power of Attorney, na e tusia a o lelei lou mafaufau. E aogā ona sa tofia e oe se tagata e te faamoemoeina e faia mea e te manao ai o lelei lou mafaufau. E pule oe i mea uma e tusia i lalo o lalo ae o lelei lou mafaufau.
Ona e lē lava le tatou avanoa i le pepa e faamalamalama atili atu ai vaega eseese o nei tulafono. E fautuaina e faafesootai lau loia, pe faafesootai le sosaiete a loia e iai tusitusiga lautele e faamalamalama atili atu ai nei vaega o le tulafono. E tāua mo le silafia e tatou uma nisi vaega o le tulafono e tatau ona faaaogā a o malolosi. E sili le sauniuni ma tapena, ae aua le faatamala ma faimea tuu. E sili le puipuia i lo le togafitia.
