O Samoa ma atunuu laiti o le lalolagi o loo tau fai atiina a’e o latou tamaoaiga, auā a lelei ma manuia o le soifua lelei foi lea o tagata. Peitai o suiga tetele o le tau ua molimauina e tusa o galuega a le ausuesue o le tau ua faamata’uina ai pea taumafaiga mo le unaia o tamaoaiga o Malo taitasi. O le saunoaga faamanuia o le Tausaga Fou 2019 a le afioga i le Palemia o le atunuu na ia folasia ai ni vaega tāua o taumafaiga a le Malo e unai le tamaoaiga ia ausia ni tulaga lelei.
“Ua faafofoga Samoa i le saunoaga manino a le Minisita o Tupe i le Palemene o Samoa, na ia faaalia ai le siisii pea o le tatou tamaoaiga. O le taunuuga manuia auiluma lena o galuega ma atina’e eseese sa fitaituga ai le Malo, le au faipisinisi, o faalapotopotoga eseese, le au faifaiva, le au faifaatoaga, tainane le sao o tatou aiga i fafo i le lagolago mai io latou aiga i Samoa nei, nuu ma ekalesia aua faalavelave fai. O le latou maa lena o loo lafo i le faufauina o le tatou Malo.”
O le saunoaga faamanuia o le tausaga fou a le taitai o le Malo ua taotaotua mai ai ma se ata lata mai o loo taoto ai aitalafu a le atunuu i fafo lea ua faaalia e le matagaluega o tupe ise tasi o ana puletini o faamatalaga tau tupe ua faaitiitia aitalafu a Samoa i fafo. Sa faamauina aitalafu a Samoa i fafo i le $1.11 piliona talu Setema o le 2018, peitai ua faaitiitia nei i le $1.09 piliona. “Faamalo foi i fesoasoani a tatou paaga e pei o Ausetalia, Amerika, Malo o Europa, Iapani, Niusila, Saina ma Malo Aufaatasi. Faamalo i lo outou alofa tulai – sao faalelei”, na saunoa ai le Palemia.
O le tulaga manuia o le tamaoaiga ua faaalia ai e le Minisita o Tupe le afioga Sili Epa Tuioti i lana saunoaga o le Tala Faaopoopo muamua o le Tupe mo le tausaga 2018 i le 2019 e 0.7 pasene na siitia ai le tamaoaiga i le tausaga faaletupe ua mae’a 2017 i le 2018, peitai e lei ausia le vaaiga mamao sa fuafuaina i lea tausaga faaletupe.
“O loo matauina le siisii pea o le tamaoaiga ona o atina’e tetele a le Malo o loo faatinoina nei, faatasi ai ma isi galuega lea ua amata faagasolo i le taimi nei”, na saunoa ai le Minisita o Tupe ae na ia faailoa foi o le faatupulaia o le tamaoaiga i le Tausaga 2017/2018, sa unaia malosi e le atina’e o Tagata Tafafao Maimoa mai Fafo, poo le vaega o Turisi ma ua atagia ai le sao taua o le talimalo o Samoa i fonotaga faava-o-malo e aofia ai le fonotaga a Malo o le Taupulega mo Fesootaiga Faaneionapo; Fonotaga a Taitai o Malo o le Pasefika, Fonotaga a le Lalolagi mo le Atina’eina o le ‘ulu; faatasi ai ma le Fonotaga Muamua a Minisita o le Pasefika mo le Puipuiga o Malie.
Ua matauina foi le sao taua o le Vaega mo Fesootaiga i le tulaga siitia ole tamaoaiga ona o le faatupulaia ole faaaogāina o lenei tekonolosi e ala i le Tui Samoa Cable. E ao foi ona ou ta’ua atina’e tetele o le Malo e aofia ai le malae vaalele faavaomalo i Faleolo; o le uafu i Matautu; faalauteleina o auala i le itu i Sisifo o Upolu; ma isi galuega tetele o loo faaauau pea o loo unaia malosi ai le vaega tuma’oti ma siitia ai lo tatou tamaoaiga.
O suiga tetele o le tau o se faamata’u lea i soo se taumafaiga mo le atina’e o le tamaoaiga ma na faaalia e le Palemia i lana saunoaga faamanuia o le Tausaga Fou, o suiga matautia ia o le tau ua iai nei e aafia uma ai atunuu uma o le lalolagi.
“Ae mafua i le vevela o le ea, o le faapogai tonu lea o le mau afā i vaega eseese o le kelope, liua ai ma eleele lafulemu ua mago ma mavaevae i le velasia i la mala, ua le toe ola ai se mutia, mamate ai lafu manu ua galala i le fia aai ma le fia feinu.
Ae pe a timu foi, ua uiga ese le mamafatu, tupu ai ma lologa ma tafega”.
Na saunoa Tuilaepa ma ia tuualalo i taitai uma o le lalolagi ina ia tutu faatasi e faia galuega uma e faaitiitia ai kasa oona o le kaponi o loo puaina atu i le ea ma le vanimonimo ina ia faaitiitia ai le vevela o le tau.
O le tasi tesimale lima Celsius o loo mataitu e faaitiitia ai kasa oona mai fale gaosi oloa a malo mauoloa o loo naunau taitai o le lalolagi a galulue faatasi e mafai ona faaitiitia ifo lea maualuga.
