O le faaaliga a faifaatoaga na faatautaia i le vaiaso na tea nei i le motu tele i Salafai na iloa ai le maualuga o le taumafaiga a faifaatoaga a le Faalapotopotoga o Tamaitai Faipisinisi a Samoa.
O se faaaliga mo faifaatoaga uma o Puleono ae o se avanoa ua faaaogā e faifaatoaga o lea faalapotopotoga e faalauiloa ai a latou foi fua o faaeleeleaga.
E to‘a 14 faifaatoaga a le Women in Business (WIB) na tausinio ae e na o le toatasi lava e lei mau faailoga, ae o le isi to‘a 13 na maua uma faailoga i lea faaaliga tele.
O le eseesega o fai faatoaga a le WIB ona o a latou faatoaga uma e leai ma se vailaau ae o se faalelei eleele foi e faaaogā ai.
Ua faamoemoe tasi lava faifaatoaga i le eleele ma le galuega o le faamamā ma le vaai lele o nei fua o faatoaga seia oo lava i le taimi e faatau ai (Organic farming).
O le tele lava lea o gaioiga na faia e o tatou tuaa i tausaga ua mavae, o le faamoemoe lava i le malosi o le tagata ma le sogasogā ina ia mafai ai ona lelei ma lē faama‘ia se toaga, peitai o le suiga ua iai i le taumafaiga ina ia vave le seleselega o fua o faatoaga ma le faafetaui atu o le tele o faaletonu ua vaaia i le eleele, o lea na tele ina tapa ai loa faifaatoaga i vailaau mai i fafo.
O lea ua amata ona toe faalauiloa taumafaiga e toe foi ai fai faatoaga i ituaiga faatoaga e le toe faaaogāina ai ni vailaau ma ni faalelei eleele ona ua atili ai le faaletonu o le eleele i nei vailaau.
O le faalapotopotoga la o Tamaitai Faipisinisi (WIB) lea ua vaaia le faamalosia o nei ituaiga faatoaga e pei ona vaaia i maumaga talo, o togafa‘i, o toga kofe, toga koko, toga vanilla, toga taamu faapea ai togalaau faisua ma togalaau aina.
E le gata i fua o faaeleeleaga ae na faapea foi ona maufaailoga ma i latou o fai lafumanu i totonu lava o le faalapotopotoga lenei.
O le lafupato, na manumalo ai Leota Leaupepe o Sili, o le manumalo i le mamoe aupito lelei le tino o le sui o le WIB i Salelologa o Wong Ki.
Tulaga tolu i le tauvaga lava o lafumamoe na maua e Leota Leaupepe o Sili, o le tulaga muamua o le tauvaga lafu‘oti, na manumalo ai Wong Ki Salelologa.
O le pulu tulaga muamua na manumalo ai Leota Leaupepe o Sili lea foi na tulaga lua lana meaituaolo (puaa) i le tauvaga o ia fagaga.
Ae o Isaako Aipovi o Satupaitea na manumalo i le lafumanu papalagi auptio lelei le tulai mai.
E le gata i lea na manumalo i le tulaga lua i tauvaga o lafupuaa. Na faapea foi ona manumalo i le tulaga tolu Leota Leaupepe o Sili i le tauvaga o lafumoa.
Faaalia e le tamaitai o loo pulea polokalame a le WIB o Alberta Malielegaoi, e faafetaia lava le galuega a faifaatoaga a le Faalapotopotoga o loo i le motu tele i Salafai auā o lea toeitiiti lava a maufaailoga uma lava ona sui, ma o se faailo o le maualuga o le tulaga ua iai galuega a fai faatoaga a le faalapotopotoga.
O le WIB o loo faapea foi ona auina atu i fafo le tele o oloa e gaosi lava i fua o faaeleeleaga i Samoa nei, e pei ona iai le konekarate tele lea ua silia nei i le lima tausaga talu ona faatautaia i le va o le faalapotopotoga lenei ma le kamupani e gaosi ai oloa e faamatagofie ai tino ma fofoga le Body Shop i Peretania.
O le suauu popo o loo avatu i Samoa nei e le faalapotopotoga lenei o Tamaitai Faipisinisi a Samoa.
